Ukraine chuan tun kar chhova Russia-in nasa taka missile-a a kah hnuah an ramin electric an mamawh zat 50% vel chu an nei thei rih lo tih a sawi.
Ukrenergo power operator chuan an ngaih pawimawh ber chu an infrastructure pawimawhte siam that leh thuai thuai a nih rualin siam tha vek tur erawh chuan hun a duh hle dawn tih a sawi.
President Volodymyr Zelensky chuan an khawpui, Kyiv pawh telin, region 15 zetin tui leh power supply an hmu tha lo tih sawiin, ‘hun khirh ber lai a ni’ tih a sawi.
Ukraine-ah hian thlasik a intan mek a, vur tlain khaw vawh lam chu tui khang theihna khawp a ni tan tawh.
Khaw vawt lutuk avanga thi an awm hlauhthawnna a na hle.
Ningani tukah khan Kyiv-a cheng 70% chuang chu power nei lovin an tho chhuak.
Kyiv Mayor Vitali Klitschko chuan electric, intihlumna leh tui tel lo chuan ‘chhiatna lian zawk’ an tawng lo vang tih sawi a harsat thu BBC Ukrainian hnenah a sawi.
Chawhnu lamah erawh chuan thuneituten electric leh tui laknate chu region hrang hrangah a tahtawla an siam that mek zel thu an sawi.
“Tui chu tlem a haw a, electric erawh a la awm lo,” tiin Kyiv-a cheng pakhat, Roman chuan Ningani tlai dar 3:00 (India-a tlai dar 5:30) khan a sawi a. A hnu deuh feah, “A tawpa tawpah chuan, darkar 24 chuang hnuah thuneituten electric min pe leh ta,” a ti zui.
Kyiv-a cheng dang, Tonya pawhin Ningani tlai khan darkar 48 zet electric an neih tawh loh thu a sawi a. “Tui erawh tlem kan nei thei ta a, electric leh intihlumna erawh a la awm thei lo,” a ti.