Mara Autonomous district Council (MADC)-a MNF leh Congress intawm sorkar, thla ruk vela upa chu no confidence motion hmanga paih thlak a ni.
MADC session neih mekah nimina session tan a nih veleh Zyhno bialtu, L.Prisila chuan sorkar rintawk lohna motion chu pu lutin motion thlawp zawng hian M.Laikaw leh K Hrahmo ten thu an sawi a, a thlawp lo zawngin CEM H.Malvina leh Dy CEM HC.Lalmalsawma Zasai ten an sawi thung.
Chairman kaihhruainain secret ballot hmangin sorkar hi fiah a ni a, sorkar rintawk lohna lamah vote 15 tlain, ringtawk lamah vote kua a tla a; H Malvina kaihhruai sorkar chu vote hmanga paih thlak a ni ta ni.
MADC-ah hian seat 25 awmin BJP lam hian vote 15 hmuin Congress leh MNF hian vote kua an hmu a, chairman erawh neutral vote niin BJP lama motion thlawp zawnga vote-tute hi tute nge tih chiang taka hriat theih a la ni lo.
Kumin May thlaa 12th MADC inthlanpui neihah khan BJP chu seat la tam ber niin 12 an la a, MNF-in seat kua leh INC-in seat li an la a, sorkarna siam tura seat lak tlin ngai zat 14 la tling an awm loh avangin MNF leh INC thawhdunna sorkat intawm a piang a, thla ruk vel an kal hnuah MADC-ah sorkar thar a pian a ngai leh dawn a ni.
Hemi chungchanga The Zozam Times zawhna chhangin BJP Mizoram Pradesh President Vanlalhmuaka chuan, MADC sorkar paih thlak a nih takah chuan BJP sorkar siam turin hmalak nghal a ni tih a sawi a, “MDC ngah zawk kan nih takah chuan kan party sorkar a piang turah kan ngai,” a ti.