PC party President Vanlalruata’n “Mizoram sorkar hi ram leh hnam humhalh kawngah a hlawh- chham” a ti a. “Assam leh Tripura aṭangin ramriah min nêk reng a, a nawrlet ngam lova, hei hi a pawi” a ti.
PC party buatsaih political training nimina a hmanpuinaah he thu hi PC party President chuan a sawi a. “Kan chhehvelah a hnam ang a nêkna tawkin, Tripura, Assam leh Manipur-a kan unaute mangang au thawm kan hre reng a. Myanmar-a kan unau ten harsatna nasa tak tawka sahimna zawnga kan rama an lo tlanlut pawh sorkarin hum ngam lovin an tana ṭha khawpin a chhawmdawl thei lo” a ti bawk.
Tunhnaia Bangladesh-a Zofate tawrhna chungchangah pawh Mizoram sorkarin aw a chhuah lo nia sawiin, Vanlalruata chuan “Hei hi thil tlawmthlak tawpkhawk a ni” a ti a. PC party chu sorkar sela chuan hetiang hi a thlen loh tur thu a sawi.
Bangladesh-a Zofa ten harsatna an tawh dan chu pawmzam theih a nih loh thu PC party President chuan a sawi a. He buaina avanga Mizorama luh tum te ramria dan beh an nih avangin Mizoram sorkar chu an dem thu a sawi. “Bangladesh aṭanga lo luh tumte an lo luh thuai theih nan leh a lo lut apiang ten chhawmdawlna ṭha tak an dawn theih na tura hma la turin PC party chuan Mizoram sorkar an ngen tih a sawi bawk.