Aizawl : Minister of state Robert Romawia Royte-in khawvel ram zawng zawngah leiba tam leh tam loh chu thawhchhuah (GSDP) atanga leiba percentage hmanga chhût thin a nih thu sawiin, Mizoram thawhchhuah (GSDP) a pun zêl avângin thawhchhuah (GSDP) atanga leiba percentage chu tûnhma zawng aiin a tlêm ta niin a sawi.
Darlung khuain an kum 100 tlin an lawmna a hmanpuinaah he thu hi nimin khan Robert Romawia chuan a sawi a. Mizoram thawhchhuah (GSDP) a pun zêl avânga GSDP atanga leiba percentage tûnhma zawng aia tlêm ta chu thil ropui leh lawmawm tak a nih thu sawiin, “thawhchhuah a pun zêl avângin leiba percentage pawh a tlêm tial tial a beiseiawm” a ti.
Robert Romawia chuan Covid hripui karah pawh sorkar department zawng zawngin hmasawnna hna an thawk nia sawiin, Covid hripui reh hnuah phei chuan sorkar department hrang hrangin Mizoram hmun hrang hranga hmasawnna hna an thawh chu hmuhnawm tham a nih thu a sawi a. Darlung khawtlangin an Football field zauh an lo dilna chu bialtu MLA Lalrintluanga Sailo nen an sawi dun tawh thu leh sorkar kum kallai thal chhûnga -Operation Mualzavata Programme- hnuaiah zauh an tum thu leh senso thenkhat chu bialtu MLA tum tur a nih thu a sawi bawk.
Sports Minister hian Darlung Centenary lawmpui nan Rs. sing 5 leh Sports hmanraw hrang hrang a pe a ni.