Meghalaya Chief Minister Conrad K Sangma chuan tun hnaia Assam nena an inrinaa Assam officer-ten silai an hmeh puahnaah an state mi thihna thleng chu ‘mihring dikna chanvo palzutna’ tiin National Human Rights Commission (NHRC)-ah hma la tura ngenna a thlen.
Sangma leh Deputy Chief Minister Prestone Tynsong chuan Zirtawpni khan NHRC Chairperson Justice Arun Kumar Mishra leh an member dangte chu New Delhi-ah an hmu niin Chief Minister’s Office (CMO) chuan a tar lang.
“NHRC chairperson leh member dangte hnenah Mukroh-a thil thleng kha mihring dikna chanvo humhalhna dik tak a nihzia kan thlen,” a ti.
“A tul anga hetiang titu laka action la ngei turin kan ngen a ni,” a ti bawk.
Sangma chuan venhim hna thawktute chu boruak a inmungna lai hmunah chuan uluk taka daha an chet dan ngaihtuah uluk hmasa sela hetiang hi a thlen loh tur thu a sawi bawk.
Thawhlehnia ramria silai hmeh puahnaah hian Assam forest guard pakhat telin mi paruk an thi a, mi dang panga hi Meghalaya mite vek an ni.