- Lallunghnema, Charity Lodge
Kum tawp kan thleng dawn a ruai chu a ni ta reng mai! Thlasik khawvawtin min hmet tan.Lehkha ziah pawh khawvawt hnuaiah chuan a peihawm lo dawn dawn e.aMahse,ka kawlawm chu computer a ni,ka ziakfung chu ka kut zungchal hi a ni.Tun thlengin tarmit ka la vuah lova.Vannei ka inti hle. Pathian malsawmna ka dawng nasa hle a ni.
Consumer Huang chhiartu mi thar in lo awm zel a. Lo tangkaipui in lo awm zel tih ka hriatin ka lawm hle bawk. Mi vengva zingah Consumer Right vei tak tak an lo awm mek zel bawk a.He pa pui hi in tilawm a ni!
Nov.ni 24 kha Consumer Advocacy Group 5th Anniversary a ni a.Thian thenkhat nen hemi Ni pual hian Consumer Outreach Programme kan hmang thei a Kan hlim hle a ni.
Ngawi renga kan thu leh hla lo tuipui an awm thin tih ka hriatin ka lawm hle bawk a ni.Chona thar leh phurna thar kan nei chho zel a. Kei phei chuan ka theih chen chen Pathianin rem a tih chuan ka ziak zel dawn a,consumerte zalenna turin ka bei zel dawn a ni!
Sport lam ziak mi ka ni lo va, music lam ziak mi ka ni hek lo, zai hi ka tui a, ka thiam lem lo. Sports-ah tuina ka nei lova, eng sport discipline pawh ni se, a kheltu a zirin ka en tui thei zel a ni. Fencing leh karate erawh ka hmu peih lua lo. A kheltu a zirin hockey, football leh volleyball te hi hmuhnawm ka ti. International level ngat phei chu hmaih har ka ti thin. FIFA WORLD CUP pawh hi ka hmaih ngai lo tluk a ni.
Consumer issue-ah hian tui loh pawh han tum eltiang teh mahila, a tui loh theih loh. Peih lo pawh ni ila, a peih loh theih loh. A chhan chu kan nitin nun tuamtu a ni miau alawm! Consumer right hi vei a ngai a nih hi!
Consumer issue hian zing thawh phat atangin min chenchilh nghal a. Thil leitu leh hmangtute hi consumer tih Consumer Protection Act 2019 chuan min hrilh a.Kan sawi cham chi! He Danpui hian kum 35 kal ta daih tawh khan thil leitu leh hmangtute chu consumer a tiin Dikna leh Chanvo a lo pe tawh a ni.Thil leitu leh hmangraltu satliah mai ni lovin zalenna nei consumer an lo ni a. Chanvo chhuh theihloh leh dikna ropui leh nghet tak an nei a ni.
Heng consumer te dikna, chanvo, zalenna te hi India sawrkar ropui tak chuan Act leh Rules siamin min lo pe a. Kan ban phak lekah min chhawp chhuah sak a ni. Hman peih, ban peih a ngai a. Huaisen a ngai bawk. Hmanni lawka Canteen Kual bula, pailum leitu pawh kha a huaisen hle. Dawrkai hnenah ngei chuan, “Consumer Forum-ah kan inhmu dawn nia” a ti siah mai! Hetiang mihring hi mi changkang an ni.
Khawvel kan hmang rei tulh tulh a, thil thleng ngai lo tura kan ngaih te chu mi thenkhat chungah a lo thleng ve ta fo mai. Ka thil tawn thenkhat pawh hi ka beisei loh a ni thin. Consumer Court-a ka awm ve laia ka lo puih thin thenkhat chuan ka tei velna hmun thenkhatahte hian min lo be ding ve chawt fo bawk a.
Good morning Sir,
I dam em?
Consumer Forum-ah khan i la awm em?
I thil buaipui ang kha i la ti em? Forum a i awm lai khan ka harsatnaah min lo tanpui a, ka la hre reng asin. Ka lawm hle a ni” tia min chelh dingtu ka tawng zauh zauh a ni. Ka lawm hle. Hetiang deuh hi tawng deuh fo ila, min tichaktu a ni thei. Chapopui erawh a hlauhawm duh viau.
Ka lawmna em em chu miin min ring a, an harsatna min hrilh ngam thin hi a ni. Kei teh lul hi theihtawp ka chhuah zel ang. Mite tana malsawmna nih tluka hlu ka hre lova, kohhran upa pakhatin a tih hi a dik a ni.
Hetiang hian kan thupui kan hawng dawn a ni. Lo chhiar ngei ngei rawh. State dangah chuan consumerte hi an ri rup zel mai a ni. “District Consumer Disputes Redressal Commission pakhat chuan kum 2015 November thla a an hospital a nu pakhat pum(stomach) an zei naa puan than, lapaw them (18×17 CM cotton) an pawh chhuah hmaih avangin cheng nuai 15(Rs.15 lakh) a chawi tur. He thu hi Oct. 26 khan chanchinbu pakhar chuan a tarlang kiau mai!
Commission hnen atang thu hmuh danin kum 25 mi Nellore District AS Peta Town a cheng R. B. Shaik chu a pumpui na( chu ni 27 2015 November thlaah he Damdawiinah hian zaisak(operated) a ni a. Mahse, vanduaithlak takin he Vellore Hospital hi a chhuahsan hnu pawhin a pum na chu a reh thei tlat lo mai a. Damdawiin eng emaw zat a pan a, engmah a ang thei chuang lo.
Bei nge sei run dung tiin R.B Shaik-i chuan KIMS Hospital chu a pan ta chawm mai a. He hospital hian an han enfiah(diagnosed with gossypiloma-scute intestinal obstruction small lowel obscuction) hnuin a pum nat chhan ber chu an hre chhuak thei ta ani. Kha hospital lar tak he bula zaitu CMC Vellore chuan lapua(cotton) an lo lakchhuah hmaih mai a ni.
Mizoram damlo tam tak dam that theih loh chhan pawh hi chhui ngai a ni ve ngei ang. Kan Kristianna leh tlawmngaihna hian min tidawih zo vek ta a nih hi!! mi thiam tam takin an ti mek. Mi thiam pawh an huaisen ngam tawh lo. Hei hi ka hmuh dan chiah a ni. Mahse,a ngaihna an hre si lo.Dawihzep turin that an chhuah a,dawt varah an innghat a nih hi!
A tawi zawngin han sawi ila, he vai nula hmel tha tak, lehkhathiam tak mai hian Christian Medical College hi legal notice pein District Consumer Disputes Redressal Commission-ah a khing ta a. He commission hian deficiency in service a awm ngei a ni tiin he damdawiin hi inthlahdah a puh a, hremna thu a chhuah ta a ni.
1) He nula hian Rs. 20 lakhs a phut a.
2) He commission hian Rs. 15 lakhs compensation pe turin Judgement a tichhuak..
3) He bakah hian Consumer Court kal man Rs 5000 chawi turin he medical college hi tih a ni.
4) He Judgement & Order hi ni 45 chhunga tihpuitlin tur a ni.
Consumer huaisente an fakawm hle.
Mizoramah doctor kan khing ngam lo. Damdawi In kan khing ngam lo. Kan va dawih em! Hei hi Mizoram a ni!
Thu dang a lai chuan, tunlai hian Gas Cylinder a zo hma thin lutuk an ti. Complain ve mai ang hmiang! Gas buktir ngam lo. London incheina el ngam, consumer right hre miah si lo, intichangkang ho hi i ngaisang si a ni lo maw?