Italy-a Naples bul, Ischia thliarkara ruah nasa tak sur avanga lei tawlhah mi eng emaw zat an thih rin a ni.
Inrinni khan lei leh hnawmhnawk tawlh hian thingkungte a hnawl a, in eng emaw zat hnawlin lirtheite pawh tuipuiah a hnawl lut leh bawk.
Chirh karah hian hmeichhe pakhat ruang hmuh a ni tih an sawi a, mi dang eng emaw zat chin hriat an la ni lo.
Chenna in tam tak tlawhpawh theih a ni lo va, khaw awm dan a la that loh avangin chhanchhuah hna thawh chak hleih theih a la ni lo.
Mi cheng pakhat, Lisa Mocciaro chuan Ansa news agency hnenah, “Zing dar 3:00 (India-a Inrinni zing dar 7:30) vel atangin khawpui ri dur dur kan hre tan a, lei min kan hre zui a, zing dar 5:00 velah a dang kan hriat belh leh a, a rapthlak hle a ni,” tiin a sawi.
Interior Minister Matteo Piantedosi chuan an dinhmun chu a khirh rih hle tih thuthar lakhawmtute hnenah a sawi a, chin hriat lohva awm mekte chu chirh kara tang an la nih a rinawm thu a sawi a. Darkar ruk chhung lekin ruah mm 155 (6.1in) a sur niin a sawi bawk.
Ruah hi Campania, Naples leh Ischia chhehvelah ni eng emaw zat a sur tawh a. Pathianni thleng ruah tam tak leh thli chak tak a la thawk dawn tih sawi a la ni.
Ningani khan mi pahnih an lo thi tawh a. Argentine khualzin chu vaukama a awm laiin tuiin a la a, mi pakhat chu tuipui kamah tekin a deng hlum bawk.
Tual chhung thuneitute chuan mi chengte chu ina tawm tam turin an ngen.
A hmain Infrastructure Minister Matteo Salvini chuan lei min avangin mi pariat an thi tih a lo sawi tawh bawk a, “Hmar atanga chhim lam thlengin, he ram hi hum a ngai a ni,” a ti.
A hnu lawkah interior minister chuan an ramah thi an la awm loh thu a sawi leh thung.
A bul hnaia awm Capri, Ischia, Tyrrhenian Sea te hi khualzinte hiptu an ni a. Ischia phei chu lehkhabu lar tak, Elena Ferrante-i ziah, Neapolitan Novel leh kum 1999-a film siam, The Talented Mr Ripley-ah a lang.