Aizawl: ZPM Leader Lalduhoma chuan mipuiin ZPM chu an beisei dan a dang a, tha zawk tura an beisei avanga danglam ngam tur an nih thu a sawi.
Inrinni khan ZPM Aizawl North III Block Conference & Political Training, Sihhmuiah neih a ni. He hun hmanpuitu Lalduhoma chuan sorkar tura inbuatsaih an nih avangin an kalna khua apiangah an mamawh an hriatpui tur a ni a, chungte chu engtia tih chi nge tih pawh an ngaihtuahpui tur nia sawiin, “Miten min beisei dan a dang, tha zawk turin min beisei; chuvangin, kan danglam ngam tur a ni,” a ti.
Lalduhoma hian kohhran leh NGO telna tlak an ni tur tih a sawi a. Rorel lai party apiangin ram an tichhe thin tih sawiin, “ZPM erawh ram maichamah an inhlan ngam tur a ni. A hnuhnung tur kan dah hmasa a, kan buai zo thin a. A pek belh thin tih hriaiin a ram leh leh a felna zawng hmang ang u,” a ti bawk.
Party inbeihnaah puitling taka chhan let thin tur a nih thu leh inhnialna phawvuakah tel loh tur nia sawiin Lalduhoma hian, “Inthlan kan hnaih chho hret hret a, thlemna a hautak tawlh tawlh dawn; hetiang hi chhuan chi a ni lo a, hruaitu kan nih chuan thlem ngam loha awm mai tur a ni,” tiin, party ni loin policy-ah rinawm an inzirtir nasat lehzual a tul tih a sawi.
ZPM Working President K Sapdanga pawhin thu sawiin ZPM chuan thluaka sum lut hi an hnawtchhuak hmasa ber dawn tih a sawi a. Mipuite laka an intiamnate pawh hriat reng a nih tur thu sawiin, “Keimahni huang chhung vei ila, hrechiang ila, thawkrim ila; ralkhata mite vei bera neih a tul lo. Keimahni theuh kan fel chuan kan ram a fel ang. A tha ber leh a chak ber nih tuma kan inel chuan kan chak ngei a rinawm, a chhan chu Mizoram sukthlek thlirin ZPM hi a khan ber kan ni,” a ti bawk.