Mizoram People Forum leh political party-ten nimin khan Central YMA Committee Room-ah inthlan chungchanga thawhhona thuthlung an siamte an thlir ho a, house to house campaign phal loh rawtna a awm.
MPF General Headquarters President Rev Dr Vanlalnghaka Ralte kahhruaia thutkhawmah hian political party hrang hrang – MNF, Congress, ZPM, BJP leh PC party aiawhte an tel a, Upa Lalramthanga’n MPF leh political party-ten inthlan dawna thawhhona thuthlung an lo siam tawh dan leh a tobul te, inthlan dawn apianga thlirho thin a nih thu te a sawi bakah tuna rawtna thar siam a nih dan te a sawi hawng nghal.
MPF Vice President Rev Dr K. Lallawmzuala chuan MPF-in inthlanna bawlhhlawh lova kalpui chu a duh dan a ni a, Zoram thatna tura ngaihtuahna seng tlang theuh turin party aiawhte a ngen a ni.
MPF-in thawhhona thuthlung thar a duan thupui pariat – inthlan, inthlan senso, inthlan campaign, zalen taka inthlan leh venhimna, policy siam, candidate chungchang, thawhhona leh tlangkawmna tia thente chu thutkhawma telte chuan an sawi ho a ni.
Thawhhona thuthlung tura rawtna siam tharah hian house to house campaign chu candidate-te tan leh MPF tan pawh a hautak thu tar lan a ni a, house to house campaign chu neih loh rawt a ni.
Rawtna hrang hrangte chu political party-ten an party theuhah an sawiho ang a, chumi hnuah MPF nen an sawiho leh dawn.
Thutkhawmah hian MPF-ah kohhran pawl dang la tel lote an tel ve ngei theih nan tan lak zel a tul thute an sawi lang bawk a a ni.