Dallas Mavericks star Luka Doncic chuan tun season a triple-double a neih tum nga na hmangin a team in NBA champion lai Golden State Warriors lakah hnehna an chang.
Nilaini zingah season liamta Western Conference finals rematch a thleng a. 116-113 in Mavericks hi an chak.
Slovenian star Doncic hian point 41 score in rebound 12 leh assist 12 a nei a. NBA a khelh chhunga triple-double a neih vawi 51-na a ni.
Dallas hian a zawna vawi li an tlawm lai chu an titawp a. An coach Jason Kidd hnuaia season hnih chhunga an tlawm zawn rei ber tum chu titawpin hnehna an chang ve leh a. Season bul an tan tha lo chu siamthat tumin an bei mek.
Tim Hardaway Jr. chuan point 22 a score bawk a, heng zingah hian huntawp dawn lamah 3 pointer pawimawh tak a tel.
Warriors tan Stephen Curry chuan point 32 a score a, a teammate Klay Thompson erawh a shooting kal loh zan niin point nga chiah a score a. Second 2.6 a la awmin 3 pointer a shoot chu a lut lo. Lut se overtime an khelh theih phahna tur a ni.
Mavericks hian All-Star vawi li ni tawh guard Kemba Walker chu tunkarah an lalut bawk a. Khup hliamin a tihbuai player hi October thla a Pistons in an chhuahtir hnuah team zawm a la nei leh lo.
Walker hi tunkarah practice a neih theih tan an beisei bawk.