Aizawl: Congress party chuan ‘Thuneihna semzai’ chungchang an zirho a. He huna sawi hawnna hmangtu, MPCC Media Chairman Dr Lallianchhunga chuan, “Mipui tana remchang siam lo, an phur tirittu anga municipal sorkar hi an hmuh zel a hlauhawm khawp mai,” a ti.
Nilainia Congress Bhavan-ah zirhonaah Dr. Lallianchhunga chuan thuneihna semzia (decentralization of power) hi ram hmasawnna atana rahbi pawimawh berte zinga mi a nih bakah, mipui sorkar (democracy) sawhnghehna atana a kila lung pawimawh berte zinga mi tih a sawi.
Mipui tan tel vena tur a siam tam a, langtlang (transparent) takin thil a tih loh theih loh a, chu chuan eirukna (corruption) a titlem a, ramin hma a sawn phah thin a. Sorkar tha siam tur chuan thuneihna semzai hi tihhlawhtlin ngei ngei ngai zinga mi niin a sawi bawk.
Mizoramah Notified Town 23 a awm tih sawiin Dr. Lallianchhunga chuan, notified town zingah Lunglei-ah municipal council din theih niin municipal board hi Mamit, N.Kawnpui, Vairengte, Kolasib, Sairang, Saitual, Khawzawl, Champhai, Serchhip, Thenzawl, Hnahthial, Lawngtlai leh Siaha-ah te din theih ni mah se, tuna AMC kal dan ang hi chuan khawpui danga municipal sorkar din belh zel tur chuan mipui rilru hneh a harsa tulh tulh ang. Mipui tana remchang siam lo, an phur tirittu anga municipal sorkar hi an hmuh zel a hlauhawm tih a sawi.
Sorkar laipuiin thingtlang leh khawpui tual chhung sorkarte hi a ngai pawimawh tih sawiin Dr Lallianchhunga chuan, “15th Finance Commission hnuaiah sorkar laipui atanga an sum hmuhte chu an dawn atanga ni 10 chhungin state sorkarin tual chhung sorkarte hnenah a pe chhuak thin tur a ni a. Hei hi a tikhawtlai a nih chuan a pung nen a chawi zel dawn a ni,” a ti.
AMC chungchang sawiin Dr. Lallianchhunga chuan, “Mipui phurrit tizangkhai tur leh mipuite tana dawr awlsamna tur kawng an siam thiam a hun tawh a. Tunah chuan inzirchawpa kal a hun tawh lo, tawnhriat nei tawh corporator-ten AMC an enkawl tawh avangin mipuite tana dawr awlsam tura AMC hi an siam thiam a hun tawh takzet a ni,” a ti bawk.