Aizawl : Economics & Statistics Department-in nimin khan Lawngtlai BDO Conference hall-ah Lai Autonomous District Council (LADC) huam chhunga nau piang leh mitthi chhinc- hhiahtu (registrar of births & deaths – RBD)-te tan intuaitharna annual training a buatsaih.
He hun hmanpuitu Lawngtlai Bawrhsap Amol Srivastava-a’n naupiang leh mittthi chhinchhiah hnathawktute chu ram hnuk khawih thil khawihtu an nih thu sawiin, inthlahdah tak leh diklo taka hna an thawh a rem loh thu a sawi a, fimkhur leh dik taka thawk zel turin a chah.
Sorkar kalphung leh hnathawhnaah thil thar a awm fo avangin training ngaihpawimawh a ṭul thu Lawngtlai Bawrhsap chuan a sawi a. Tha leh felfai zawka hna an thawh theih nan training-a an thil zirte ngunthluk taka zira, a taka hman ṭangkai tum turin training-a tel te chu a chah bawk.
Economics & Statistics Department-a Deputy Director B. Vanlalrengi’n India ramah digitised birth certificate leh death certificate hman ṭan mek a nih thu leh seal leh signature a awm loh avangin mi tam takin certificate lem anga an ngaih thu a sawi a. Digitised certificate-a barcode chu phone-ah emaw QR code scanner hmanga scan-in, Registrar General of India (RGI) website-a a awm leh awm loh endik nghal theih a nih thu sawiin, digitised certificate-ah a lem a awm theih loh thu a sawi.
Registrar of births & deaths te tan intuaitharna annual training-ah hian Inspector of Statistics J. Ramdinmawia, Lalfakawmi leh Ricky Lalhriatpuia ten Civil Registration System chungchangah training an pe a ni.