Aizawl: BJP Mizoram Pradesh-in ni thum awh, State Level Training an buatsaih chu Inrinni khan an khar a. He hun hmanpuitu Union Minister of State Ministry of Minority Affairs John Barla chuan BJP leh Kristianna chungchanga harsatna awm anga sawi hi politics-a inbeihna mai niin a sawi.
BJP party pisa ‘Mipui Run’-a hun hmanah Barla hian ‘Modi Government & Welfare Schemes’ tih thupui hmanga thu sawiin, BJP-ah amah ngei pawh Kristian pa ni chungin Hindu tamnaah thlan tlin niin, union minister hial a ni thei tih a sawi a. “Delhi-ah kalin ticket hi ka dil lo a; mahse, heng ka thlen theihna chu ka hnathawhte Delhi lamin an hriat avangin min rawn be mai a ni,” a ti.
Barla chuan BJP kaihhruai sorkar hnuaiah Kristian pain union minister nihna a chelh thei hial avangin BJP leh Kristianna chungchanga harsatna awm anga sawi hi politics-a inbeihna mai a nih bakah, eptu party-ten BJP thatzia an hriat vang leh, BJP-in Mizorama sorkarna an chan chuan BJP ni lo party dangte hian hun tha an neih ve theih tawh loh an hlauh vang nia a lan thu sawiin, “A chhan chu BJP sorkarna state-ah chuan hmasawnna nasa taka a thlen thin vang a ni. BJP sorkarna state-a hmasawnna thleng ang hi Congress leh a thawhpuite sorkar lai khan hmuh a nih ngai loh mai bakah, India mipuiin hetiang hmasawnna hi kan beisei phak lo hialin a lang a ni,” a ti bawk.
Union minister hian sorkar laipuiin sports atan te, education atan te, hostel sakna tur leh market sakna tur bakah kawng hrang hranga Mizoram hmasawnna tur atan Rs. vbc 1,000 chuang pe tawh mah se Mizoram sorkarin sum a hman dan an zawhin utilization certificate an dil pawh pek tur a nei lo tih a sawi a. “Heng sum hi Kristian ram intingam state-a thil thlengah chuan a zahthlak hle a. BJP chuan sakhua tih bik leh chi inthliarna nei loin, mi tinin an mamawh an chanvo an chan theih nan hma kan la mai thin,” tiin, hmasawnna hna mipui hnena thlentir hi BJP kalphung a nih avangin, sorkar laipuiin Mizoram sum a pek tihchingpen ang hi BJP sorkarnaah chuan a awm ve dawn lo niin a sawi.
He hunah hian Barla bakah Sabitra Mangherita MP (R.S) & Spokesperson leh Jayanta Malla Baruah, Minister of PHE, Skill Employment Entrepreneurship & Tourism, Govt of Assam te chu speaker niin training pein thu an sawi bawk a ni.