France tana goal khung hnem ber record thar siam a ni a. Striker Olivier Giroud-a’n mellungthar a kai zanah star player Kylian Mbappe a langsar.
Pathianni zanah France in Doha a Al Thumama Stadium-ah Poland hmachhawnin round of 16 an khel a. 3-1 in hnehna an chang.
AC Milan striker Giroud-a’n ram tana a goal 52-na a khung a. Thierry Henry lehpel in France tana goal khung tam ber a ni.
Record siam zan
World champion ni lai in quarter-final lut turin harsatna lian tak an tawk lo. An inkhelh chhunga goal hlauhawm siam hnem zawk an ni a. First half tawp dawnah goal an khung.
Kylian Mbappe ball pek chu minute 44-naah Giroud-a’n lo la in a hma laka a goal khung tur tha taka lo dangtu Wojciech Szczesny chuan a goal khung tur a veng tluan thei tawh lo.
Second half-ah Mbappe hun a thleng ve a. Minute 74-naah an goal hnihna rang leh mawi taka a khung hnuah minute 91-naah goal a khung nawn.
Piotr Zielinski in first half a huntha a neih chu Poland chance tha ber a ni a. Huntawp dawnah Robert Lewandowski chuan penalty atangin goal khat a khung.
Kum 36 mi Giroud-a’n inkhel pawimawh a chetthat a chin la chhunzawm a. Ram tana vawi 117 a khelhnaah record a siam.
Ani bakah Mbappe in Pele record siam. Kum 24 tlin hma a World Cup a goal sarih khung chu khumin a goal hmasa zawk a khungin goal riatna a ni a. World Cup-ah match 11 atang goal 9 a khung tawh.
Tun tumah bik goal nga khung tawhin top scorer a ni mek.
France coach Didier Deschamps chuan, “Kylian kan hria a, a theihna kan hre vek. Vawi leh khata inkhel thlak danglam thei a ni a, France in Kylian Mbappe tak tak a mamawh hunah tak a rawn inlar.” a ti a.
“Giroud hi player pawimawh a ni reng. Kum li kalta khan goal khung miah lo mahse a theihna kha hai theih a ni lova, tunah goal a khung tel ve tawh a ni.” a ti bawk.
An hmaah Three Lions
Al Bayt Stadium-ah England in Senegal lakah chak an harsat lova. Inkhel tan tir lamah khel fuh chiah lo mahse minute 39-na a goal an khung hnuah erawh chak tur zawk a chiang.
England tan Jude Bellingham chu a khaipa berah a tang leh a. An forward line hnungah ball fing taka semtu niin a ke atangin hlauhawm a chhuak hnem.
Minute 38-naah Jordan Henderson goal khung tur chu duhthusam a tha in ball a cross sak a. Halftime dawnah Phil Foden nen inkawpin tlarhnung an thiah hnuah Harry Kane chuan an goal hnihna a khung.
Kane hian England tana goal khung hnem ber Wayne Rooney record chu goal khatin a pha lo mek a. Record siam theihna hun a nei dawn.
Foden bawk England goal thumnaah a langsar a. Bukayo Saka goal khung tur siamsakin Senegal goalkeeper Edouard Mendy a che hman lo.
Inrinni zanlai dar 12:30-ah France nen semi-final luh an inchuh ang.