December 12, 2022 atangin Aizawlah traffic dan bawhchhiate enfiah rûnpui leh inngaihhnathiamna awm loh hun ‘no tolerance drive’ kalpui a nih dawn avangin tunlai hian lirthei khu endik tum an tam hle.
Mizoram Pollution Control Board (MPCB)-in Aizawl khawpui chhungah lirthei khu endikna hmun thum an nei a, test centre-te chu December 5, 2022 atang khan a lun zual hle a; intlar an tam hle a ni.
The Zozam Times-in nimin khan Secretariat Complex-a lirthei khu endikna hmun a tlawh a, thawktute chuan pollution certificate diltu hi Thawhtanni atang khan an pung hluai tih an sawi a, test centre an hawn hma atanga lo intlar lawk thahnem tak an awm thin thu an sawi.
MPCB lirthei khu endikna hmun enkawltute chuan test centre chu zing dar 9-ah hawng tanin tlai dar 5-ah te an khar thin tih an sawi a, “Tun hnaia lirthei khu endik tur a tam leh hnuah ni khatah lirthei 250 bawr vel endik ziah ang kan ni,” an ti.
The Zozam Times-in Secretariat Complex-a lirthei khu endikna hmun a tlawh lai pawh hian two wheeler intlar pawh 100 chuang an awm a, lirthei intlar hi a thui hle a; secretariat office kawt thleng a ni.
MPCB-in lirthei khu endikna hmun dang a neih Bawngkawn leh Zemabawk-ah te pawh lirthei khu endiktir hi an thahnem hle tho niin MPCB hotute chuan an sawi.
Mizorama Motor Vehicles Act siam that hman tan a nih dawn hma, August thla lai hawl vel khan lirthei khu endikna hmunte hi a lun thei hle a, a hnu lamah erawh lirthei khu endik tur hi a tlem tan a, tun hnaiah ‘no tolerance drive’ kalpui a ni leh dawn takah lirthei khu endik tum hi an tam chho leh ta a ni.