Aizawl: Health Minister Dr R Lalthangliana chuan nimin khan Sialsuk PHC building thar a hawng.
Hawnna inkhawmah thu sawiin health minister hian, tun hnaiah specialist doctor 10 chuang an chhuak mek a, mumal deuh zawka thawktu an indaih theih a beisei thu a sawi a. “Covid-in kum hnih leh a chanve min tibuai a, hna ruak hnawh khahna tur sum pawh hmun dangah hman a ngai a. Tun hma zawng khan Covid-19 a awm ve lo a, kan sorkar kum li chhungin Covid, vawk pul hripui, lirnghing, ramri buai, raltlan kan hmachhawn a, duh angin hma kan la thei lo a ni,” a ti.
Dr R Lalthangliana hian sub-centre 300 chuangte pawh Health & Welness-ah an hlang kai tawh a, nakkum March thla hma hian hlan kai hman vek an tum thu leh hospital pangngai ang deuh veka tihchangtlun an tum tih a sawi a. PHC pawh financial year hmain CHC-ah upgrade zawh vek an tum thu leh health clinic thar 235 function-tir hman vek tum thu a sawi bawk.
He hunah hian khual zahawm, bialtu MLA Prof. F. Lalnunmawia pawhin thu a sawi a ni.
Hawnna inkhawma tar lan a nih danin Sialsuk PHC building thar hi NABARD RIDF – XXV sum, Rs. 2,28,68,000 hmangin CB Engineering, Venghlui, Aizawl-te sak a ni a. October 14, 2020-ah sak tan niin, December 1, 2022-ah sak zawh a ni.
Health minister hi bialtu MLA, H. Biakzauva, MLA, L.T.Kima Fanai, Member, Commerce & Industrial Dev. Board, Dr. T. Lalhmangaihi, Principal Director, H&FW, Dr. Vanlalsawma, Joint Director (P) DHS leh official dangten an tawiawm a ni.