Aizawl : District Research Office (DRO), Economics & Statistics, Champhaiin nimin khan DRO Training Hall, Champhaiah Registrar of Births & Deaths (RBD) te tan Civil Registration System (CRS) training a buatsaih a. District Registrar of Births & Deaths, Bawrhsap ni bawk James Lalrinchhana’n a hmanpui.
Champhai District Registrar of Births & Deaths James Lalrinchhana chuan RBD te chu khawtlanga nu rawnkai leh pa rawnkai te an nih thu sawiin, Booth Level Officer (BLO) ni tel bawk an awm nual chuan an pawimawh zia a tarlang niin a sawi a. Ram leh hnam tana him tur chin thliara uluk taka hnathawktu leh kawngkharpui vengtu ‘gatekeeper’ pawimawh tak an nih thu a sawi.
Document lem hmanga voter ID neih tum leh dan kalha chetlak tum an awm thin thu leh manchhuah an nih fo thin thu sawiin, Champhai Bawrhsap chuan hetiang thil a hmasabera lo dang theitute chu RBD te an nih avangin theihtawpa ngaihtuahna seng thin turin a chah a. An bial chhunga chengte chinchang hriaa chhui chiang tur te leh dik nia an hriatah huaisen taka tang ngam turtein a chah.
Bawrhsap chuan naute pian laia nu leh pate nihna leh khua leh tui neihna hriat a pawimawh thu sawiin, “ramdang mi kan rama piang nazawngte khua leh tui anga pawm theih an nih lo” a ti a. Document siam dang- lam thin forgery case hnuaia man chhuahte kum hnih chhung lungin tan leh lei chawi tir theih an nih thu sawiin, RBD te chu document pekchhuah leh form pawimawh fill up dan fimkhur taka endik thin turin a chah bawk.
Khua leh tui dik takte electoral roll-a an luh theih nan document neih ngaite an lo neih fel lawk a tul thu pawh Bawrhsap chuan sawiin, RBD leh BLO te chu hemi kawngah hian khua leh tuite hnena zirtirna tam zawk pe thin turin a chah a. “Electoral roll-a felfai phawt chuan inthlanna felfai leh thianghlim kan nei thei dawn a ni” a ti.
RBD training-ah hian CRS chungchanga hriattur pawimawh hrang hrangte H. Lalhmangaiha, Inspector; Lallianpuii, UDC leh Vanromawia, DPA ten an zirtir a. Zawhna leh chhanna hun hmangin, RBD te Birth & Death Register leh Certificate-te enfiah a nih bakah hnathawhna hmanruate sem nghal a ni bawk a ni.