Aizawl : ZPM Working President K Sapdanga chuan Zoram kil tin an fan kualnaah kalphung thar an aupui thin chu mipuite’n an nghakhlel em em niin a sawi.
Lengteng bial chhunga Hliappui, Ngopa, NE Khawdungsei leh Saichal khuate an tlawhnaa vantlang inkhawm buatsaihah thu sawiin K Sapdanga hian, “ZPM party ten kalphung thar aupuiin Zoram kil tin kan fang kual a, heta kan thil hmuhchhuah chu khaw tinah mipuiten kalphung thar an nghakhlel em em a ni tih hi a ni. Khaw kilkhawr apiangah an mangang leh zual,” a ti.
ZPM hian mipui mamawhna a phuhru zo lo ang tih an hlau nia sawiin ZPM Working President hian, ram pum huapa kalphung thar an kalpui a, mipui huapzo hmasawnna a thlen theihna turin an inbuatsaih sauh sauh niin a sawi a. ZPM chuan last minute hmanga rorel tumna te chu diknain um bo an tum bakah dahkham politics nuai bo an tum thu a sawi.
K Sapdanga hian ram roreltute’n tu emaw sum bawm milin hlauh an nei thin chu tihbo an tum thu sawiin, “Kan ram roreltu lu ber hian siamtu Pathian hi tih se la. A thil tih engah pawh chunglam mitmei vengin programme siam rawh se. He ramah hian Pathian tihna nen ro i rel ve tawh ang u tiin kan in chah duh a ni,” a ti bawk.
Khaw hrang hrang an tlawhnaah ZPM Consultant F Rodingliana, PAC member TBC Lalvenchhunga leh Baryl Vanneihsangi te pawhin thu an sawi a ni.