Aizawl : Lengteng bial leh Sialkal Range Development Council (SRDC) huamchhunga chhungkaw harsaa zirlai First division leh a chunglama pass mi 29 hnenah bialtu MLA, L Thangmawia MLA fund atangin Rs 3,94,000 sem chhuah a ni a, SRDC fund atangin zirlai 9 hnenah Rs 1,16,000 semchhuah a ni bawk.
Lengteng bialtu MLA leh SRDC Chairman ni bawk L. Thangmawia chuan chhungkaw harsa tak atanga lehkha zir a nih thin thu sawiin, retheihna chu zirna hlawhchham phah nana chhuanlam tling a nih loh thu a sawi a. Lehkhathiam hmasa chhuanawm tak tak te pawh retheihna hneha hlawhtlinna chang an nih deuh vek thu a sawi.
L. Thangmawia chuan Assembly committee peng pakhat General Purpose Committee-in MLA fund hman theihna pakhat -GIA to Educational Insitutions- tih thin chu -GIA to Education- tia a thlak tura thutlukna a siam avangin zirna in (Institution) chauha MLA fund hman theih thin chu zau zawka zirna lama hman theih a nih tak thu a sawi a. Lengteng bial MLA fund pawh zirna lam atana changin zirtirtu indaihlohna phuhruk tura zirtirtu rawihna atan te, IAS nih tum puih nan te, sikul mamawh hrang hrang lei na atan te, Sikul te sports-a an tel theihna atan te, sikul building sak nan te leh zirlai harsa tanpui nan te, bial chhunga zirlai pawl hrang hrang tanpui nan te tangkai taka an hman thu a sawi bawk.
Sorkar thuchhuahin a tarlan danin MLA fund atanga zirlai tanpuina chu BDO, Ngopa Chairman-na hnuaiah a thlang tur committee awmin First division-a pass chin, chhungkaw harsa atanga thlan an ni a. Kum 2019-ah zirlai 13 tan Rs 2,10,000, kum 2020 ah zirlai 18 tan Rs 2,50,000 sem a lo ni tawh a. Hripui leng avangin kum 2021 ah sem a ni lova. Kumin 2022 ah zirlai 29 thlanchhuah te tan Rs 3,94,000 sem a ni.
SRDC fund atanga zirlai tanpuina chu SRDC hnuaia Hostel & Education Committee-in a thlante hnenah pek thin a ni a. Kum 2020-ah zirlai 15 tan Rs 2,00,000 sem a ni a. Kumin 2022-ah zirlai 9 tan Rs 1,16,000 semchhuah a ni thung.