Aizawl: Chief Minister Zoramthanga chuan nimin zing khan TCIL (Telecommunications Consultants India Limited) hotute nen Aizawl khawpui leh a chhehvel hmun hrang hrangah hmasawnna ruhrel lian dinna tur hmun remchang an enfiah.
Chief minister ho hian Hlimen Central Workshop-a commercial vehicle tana lirthei chawlhna tur terminal atana ruahmannate thlithlaiin, MoRTH atanga sum hmuha helai hmun veka transport hnathawh mek te leh Lalsavunga Zoological Park te an tlawh a, Chaltlang Tourist Lodge tihchangtlun theih dan tur remchang pawh an en ho bawk.
Heng bakah hian Chaltlang – Bawngkawn inkar elevated road siamna tur TCIL ten ruahmanna an lo siam tawh chu a hmunah innghahna tur lai an ruahmante an enfiah a. Hei bakah Zuangtui Godown tlawhin, ruahman anga mipui tan a awlsam zawkna tura sawnchhuah a nih hnuah he hmun hi tangkai zawka hman theih dan tur te sawiho a. Khawpui thang zelah khualzinmite thlenna tur mamawh belhnate sawi lan ni bawkin, a remchan danin neih sa tihchangtlun leh a thar sak belh theih dan turte ngaihtuah zui zel tum thu an sawi.
Chief minister hi Secretary to CM K. Lalthawmmawia, PWD Engineer-in-Chief Bowman, Tourism Joint Secretary V. Lalengmawia leh sorkar mi pawimawh dangten an tawiawm a ni.