Aizawl: Aizawl Traffic police leh transport department-a enforcement staff te chuan nimin atang khan ngaihnathiamna tel loa lirthei enfiahna, no tolerance drive an kalpui tan a, ni hmasa berah dan bawhchhe sum chawi chu Rs. 1,57,400 a tling.
No tolerance drive kalpui tan niah hian Bara Bazar leh Vanapa Hall kawtah lirthei endik a ni a, lirthei dan bawhchhia 133 an man a, an zinga 80 chuan dan bawhchhiat man an chawi nghal a, nimina an chawi zawng zawng hi Rs. 1,57,400 a ni.
Traffic Police hotute chuan lirthei dan bawhchhia an man zinga a tam ber chu document fel fai lote an nih thu an sawi a, lirthei dan bawhchhiate sum chawi a tam tawh avangin sum chawi tlingkhawm pawh a tam lo thei lo tih an sawi bakah mipuite chu an himna tura dan zawm tura an ngen thu an sawi a ni.
No tolerance drive hi kar khat chhung kalpui tura ruahman a ni.