Argentina thiampuipa Lionel Messi bawk a che ropui leh a. An team hmahruaitu niin an ram chanchin a vawi rukna atan World Cup final an khel dawn.
Thawhlehni zanah Croatia nen semi-final-ah an inkhel a. Messi-a’n goal khat a khung bakah goal dang vawikhat a siamsak a, an khingpuite tibuaitu berah tang lehin 3-0 in hnehna an chang.
A tawp nan
Khawvela football thiam ber a chhaltu ngah tak Messi-a’n Lusail Iconic Stadium-ah ropui ber nia an chhal chhan a lantir leh. Kum 22 mi Manchester City striker Julian Alvarez nen an ram mamawh goal-te khungin a tawp nan Messi-a’n trophy tam tak a lo lak tawh zinga la tel lo World Cup trophy lak tumin a bei dawn.
Final luh inchuhna inkhelah Croatia tawnhriat nei tha tawh rual an khel chhe lova. Muallaiah Luka Modric bula Mateo Kovacic leh Marcelo Brozovic te che tla an che chhe lo.
Inkhel tan tir lamah ball an chanin awmze nei a inpe thei zawk an ni. Nimahsela Argentina player-te an thiam a. Tun World Cup a che tha Julian Alvarez chu rang taka ball pe lutin an chhandamtu ni fo thin Croatia goalkeeper Dominik Livakovic chuan a lo ti tlu a, sawizui hlawh takin penalty a chawi.
He penalty hi minute 34-naah Messi-a’n goal-ah a khung a. Goal khat an neih hnuah Argentina in inrintawkna nen an khel zui.
Lehlamah Croatia player-te inkhel a tlahniam a. Tournament kal rei tawhah an player rinrawlte an chau tih a lang.
Minute nga hnuah Alvarez-a’n an goal hnihna a khung zui a. Counter-attack atang ball a hmuh chu amah a khalh lutin a paltlang a. Livakovic-a goal-ah ‘solo goal’ a khung.
Second half-ah pawh inkhel a danglam lo. Argentine player-ten counter-attack an khel a, Croatia player-ten goal nawr tum thin mahse nidang angin an khingpuite tlarhnung an thiat hleithei thin lo.
Minute 69-naah Messi-a’n a ropuina a lantir. Mual sir dinglam atang ball changin a tlanpui a, amahin Croatia tlarhnung chhaihbuaiin an defender chhuanvawr Josko Gvardiol chuan a veng thei lo. Byeline atangin ball fing a thai lut a, hei hi Alvarez-a’n an goal thumna turin a lo khung.
Messi hian kum 2014 World Cup final a Germany laka an tlawm tawhna siamthat theihna hun a nei dawn a. World champion nih theihna hun nei turin Pathianni zan final a khel dawn.
Croatia an fakawm
Messi leh Alvarez ten tun tournament-a an lo tih tawh angin an team an chakpui a. Croatia in fakawm takin semi-final lut mahse a tawpah anni pawn an dang zo bik lo.
Argentina lakah nidang ang lo takin an tlarhnung a nghet lova. Tun tournament a defender tha ber nia tam tak chhal kum 20 mi Josko Gvardiol pawh Messi lakah a che tha viau thei lo.
Nimahsela Qatar a an inkhelh danah Croatia in fak an phu a, a bikin an captain Luka Modric bawkin fak a hlawh.
Muallai atang a team khaikhawmtu a ni a, Croatia player thate kum 30 ral kai an ni deuh fur tawh chungin team naupang zawkte tha za an la tluk fo.
A chawl tawh dawn
Inkhel zawhah Messi chuan final chu Argentina tana a inkhelh hnuhnun ber a nih tur thu a sawi a, champion ngei a tum.
Kum 35 mi hian tun World Cup-ah goal nga a khung tawh a, assist vawi hnih a nei tel.
A World Cup vawi nga na khel mek Messi chuan, “World Cup a ka zinkawng hi final khel a ka khar tur hi ka hlim. Ram tana ka inkhelh hnuhnung ber chu final a ni dawn, hei hi a lungawithlak ka ti.”
“Tun World Cup a ka thil tawn zawng zawng hian rilru a luahin a khawih hle. A dawt leh thleng tur chuan kum tam nghah a ngai a, hei hi ka theih ka ring tawh lo. Hei hi a tawp khar dan tha a ni.” a ti.