Aizawl: Modern English Higher Secondary School Golden Jubilee lawmna chu nimin khan R. Dengthuama Hall, Mualpui-ah neih a ni a, Sport Minister Robert Romawia Royte chuan khuallian niin a hmanpui.
Khuallian chuan Salvation Army-ten Modern English Higher Secondary School, kum 1972-a an lo din chu Mizoram chanchinah chhinchhiahtlak tak niin he school hian mi thiam tam tak, ram leh hnam hruaitu mi tangkai tak takte a lo chherchhuak tawh a, kum 50-na hial an lawm thei chu lawmpuina leh duhsakna a hlan.
“Mizorama school tam tak zingah a tha ber pawl, chhuanawm leh hmingtha tak a ni,” a ti a, “School tam takten result tha neih duh luat vanga a thiam sa chauh an admit thin tih a nih laiin Modern English HSS erawh chuan zirna lama bil deuh, chan chhe zawkte tan duhsak taka admission pein result tha tak an nei thei fo chu a fakawm hle a ni,” a ti.
“Zirna hian lehkhathiamna chauh a huam loh angin, zitiruten an zirlaite lehkhathiamtir mai bakah an nunchang thlenga an enkawl thin chu an entawn tlak hle a ni,” a ti.
Minister chuan zirlaite chu ram leh hnam inghhahna lung pawimawh tak an nih thu sawiin, hnam boral mai kan nih lohna turin zirna kawngah theihtawp chhuah turin a fuih.
Thiamna ringawt ni lovin rinawmna, dikna, thawhrimnate chu hnam hmasawnna atan a pawimawh hle a, zirlaite chu lehkhazir bakah an nunchang leh nunphungte vawng dik turin a chah nghal a ni.
Zirtirtu leh zirlaite inkarah inhriatthiamna tha a pawimawh nia a hriat thu sawiin Robert Romawia Royte chuan zirtirtute chu zirlaite chu an rila rahte an hmangaih anga hmangaih a ziritir thin turin a sawm a, zirlai naupangte pawhin an ziritirtute chu zah thiam turin a chah nghal a ni.
Robert Romawi Royte chuan Golden Jubilee puala souvenir buatsaih, ‘Nightingale’ chu a tlangzarh nghal a. Modern English Higher Secondary School hi Aizawl Dawrpui Venga awm niin zirlai 800 vel an awm mek a ni.