Aizawl: Mizoram Consumers’ Union-in nimin khan Annual General Meeting an neih bakah an kum 25 tlin an lawm a, he huna khuallian, Supply Minister K Lalrinliana chuan mipuiten an dikna chanvo an hriat chiana an auchhuahpui ngam a tul tih a sawi.
Supply minister chuan eirawngbawlna gas delivery kalpui mek chu lawmawm a tih thu leh a awlsam zawk mai piah lamah a him zawk thu a sawi a, “In kang leh rikrum thilah gas cylinder tam tak kawl ngai tawh lovin insaseng zung zung a awlsam tawh dawn a ni,” a ti.
K Lalrinliana chuan MCU-in kum 25 hmel hial a lo hmu ta chu a lawmpui tak zet tih a sawi a, MCU hruaitu hmasate leh tuna hruaitu ni mekte thawhrimna rah a nih thu sawiin, “Huaisen taka mipui dikna chanvo atana beitute inpekna chu a fakawm tak zet a ni,” a ti bawk.
MCU Annual General Meeting cum Silver Jubilee lawmna Synod Conference Centre-a neihah hian khualzahawm, Supply Department Secretary Ramdinliani, MCU President Prof Chawngsailova ten thu an sawi a, supply department hotuten ‘LPG Online Refill Booking and Home Delivery’ tih thupui hmangin zirtina a pek bakah MCU hruaitu hmasate chawimawina hun hman a ni bawk.