Mexico chuan khawvela mei zuk khapna (anti-tobacco law) khauh ber tura ngaih a hmang tan dawn ta a, vantlang hmun hrim hrimah chuan zuk khap hmak a ni dawn.
Khapna thupek hi kum 2021 khan hman tura pawm a lo ni tawh a, vaihlo fakna chi hrim hrim pawh a khap hmak dawn.
Latin American ram dang eng emaw zat pawhin vantlang hmuna mei zu an awm lohna tur dan an siam tawh hlawm bawk.
Hetih lai hian Mexico-in dan a hman tur hi America puma khauh ber leh khirh ber tura ngaih a ni.
Hei mai ni lovin khawvel huap pawhin a khauh ber pawl a ni a. Mexico hian kum 2008-a dan an siamah bar, thingpui dawr leh hna thawhna hmunah te mei zuk phal lohna hmun siam zel tura tih a ni a. Hengah hian park, tuipui kam, khualbuk, pisa leh thingpui dawr a huam.
Dan tharah hian vaihlo lam chi hrim hrim fakna, sawi mawi leh sponsorship chi reng reng khap a ni tel dawn a. Dawr chhungah pawh cigarette dah lan pawh khap a ni dawn lo tihna a ni.
Vaibel leh e-cigarette pawh khauh zawka khuahkhirh a ni dawn a, a bikin in chhung (indoor)-ah khuahkhirh a ni ang.
Pan American Health Organisation chuan hetianga Mexican sorkarin vaihlo khuahkhirhna khauh tak a siam hi fakin rahbi pawimawh tak a nih thu an sawi.
He pawl hian vaihlo chu ven theih si, khawvela thihna thlentu tam ber a nih thu a sawi a, America pumah hian kum tin mi maktaduai dawn an thi ziah a. Hei hi a zu leh ei thin bakah a khu chhuak lo hip ve thinte an ni.
Hetih lai hian mei zu mite chuan heti taka khuahkhirhna khauh hi an duh lo hle a, dan rawng lutuk niin an sawi.
Tuna a lan danah chuan mei hi mahni inah emaw, mi dang awm ve lohna kilkhawr takah emaw chauh a zuk theih dawn niin a lang a ni.
Mi thenkhat chuan dan kenkawh hautak dan tur leh tute nge kengkawh dawn tih chu an zawhna a ni nghal bawk.
Mexico-ah hian police-te hi tham an awlsam em em nia sawi thin a ni a. Dan hi khauh hle mah se chawi emaw, inhremna emaw tak tak thleng lovin tham lungawi mai zelna a tam phah mai mai zawk thei niin an sawi.