Minister of State atanga bân tak, Siaha bialtu MLA Dr K Beichhua chuan bân a nih chungchangah tumah a dem loh thu a sawi.
Inrinni khan kum thara a bial a tlawh hmasak berah Siaha tlawhin, Siaha district kawtchhuah, Kaochao-ah hmuah niin Siaha bazar traffic point-ah hmuahna inkhawm neih zui a ni.
Thu sawiin Dr K Beichhua chuan party bik sawi loa political party zawng zawngten lungrual taka an lo hmuak chu ropui a tih thu leh lawmawm a tih thu a sawi a, an chhungkaw tan chuan an dam chhunga an theihngilh tawh loh tur a nih thu a sawi.
Dr K Beichhua chuan kum li chhung minister of state a nih chhungin Pathianin Siaha district-ah thil ropui tam tak a tihsak a ni tih sawiin, a hmalakna hrang hrang a tar lan bakah hun thar lo inher chhuak turah pawh hmasawnna hna tam tak a la thawhsak zel dawn nia sawiin, “Siaha district-in politics-a hun khirh a tawh mek chu hun hlui atanga hun thar, kawng hlui atanga kawng thara min hruaitu tur a ni,” tiin, “Hma lama hun tha lo inher chhuak tur chu beiseina kan thlir mek zawk a ni,” a ti.
Siaha bialtu MLA chuan ram tana thil tha turah chuan tlak ngam politics khelh a hun tawh tih a sawi a. Ram tan chuan political party bik ti loin, ke pen ho zel tur a nih thu a sawi bawk.
Siaha district kawtchhuah, Kaochao-ah MADC CEM M. Laikaw leh a thawhpui EM rualten an lo hmuak bawk a ni.