Kumin March ni 2-a Aizawla G20 Business meeting neih tura inpuahchahna atana din Core team chu Zirtawpni kalta khan Nodal officer for Mizoram for overall Coordination of G20 meeting Home Commissioner H. Lalengmawia hovin an thukhawm a. Sub-Committee 9-in ruahmanna an siam te an thlirho.
Thutkhawm kaihhruaitu Home Commissioner H. Lalengmawia chuan G20 meeting chu Mizoram sorkarin hlawhtling leh hneh taka thlen a duh thu sawiin, he meeting hi Mizoram leh Mizote hmel lanna bakah India hmel lanna pawh a nih tel tur thu a sawi a. Kil tin atanga inbuatsaihna leh inpuahchahnate chu a tha thei ang ber a nih a tul thu a sawi.
Sub-Committee 10 zinga 9 ten ruahmanna an siam chhin te he thutkhawmah hian pharh niin, an thlirho a. Sum mamawh tur chungchang te an sawiho bawk.
G20 Chief Coordinator, Foreign Secretary hlui Harsh Vardhan Shringla chuan tun thla ni 27-ah G20 meeting chungchang Mizoram sorkar hotute sawipui turin Aizawl a rawn tlawh beisei a nih thu sorkar thuchhuah chuan a tarlang.
Sorkar thuchhuah- in a tarlan danin December ni 1, 2022 khan India chuan G20 Presidency kum khat atan a chelh tan a. In- dia Presidency chhung hian ram chhung khawpui hrang hrang 50-ah meeting leh event chi hrang hrang 200 aia tam buatsaih a ni dawn. Hengte hi sorkar laipui chuan ram chhung khawpui lian bakah hmarchhak state khawpuiahte a nghat dawn a ni.