Aizawl FC in tun season I-League a away hnehna hmasa ber an chang a. Thawhtanni chawhnuah Sudeva Delhi FC 2-1 in an hneh.
Chhatrasal Stadium-ah Aizawl FC in Henry Kisekka leh Lalchhanhima Sailo te hmangin second half-ah goal an khung a, dinhmun hahdam takah an awm.
Mahse minute 86-naah Sudeva substitute Carlos Pao chuan goal khat a khung a. Hnehna chang turin Mizo club in a tawp an khar uluk a ngai hle.
Sudeva Delhi hi tun season a an khelhthat ber tum a ngaih theih a ni a, first half-ah pawh Aizawl FC an tibuai fo.
Ball chang hnem zawkah an tang a, mahse an lama goal nawr an dawl lo. Ugandan striker Kisekka chuan goal hmahruai a khung hnuah Aizawl FC inrintawkna a lian zual a. Minute 70-naah Chhanhima’n tun season a a goal thumna mawi takin penalty area hmawr atangin a pet kual lut.
A goal khung tur siamtu R. Ramdinthara chuan assist vawi nga a neihna a ni a. I-League-ah Sreenidi Deccan player pawimawh Rosenberg Gabriel nen hma an hruai mek.