Aizawl: Congress party-in chawlhkar tin Nilaini bik thupui hrang hrang sawihona hun an hman thin angin nimin khan sorkar inawpna tha (good governance) nei tura dan leh hrai kenkawh pawimawh zia an sawi ho.
Congress Bhavan-a thupui sawihona an neih hi Lalremsanga, Secretary, MPCC-in kaihruaiin, TT Zothansanga, ex-MLA, General Secretary i/c Good Governance-in a sawi hawng a ni.
He sawihona hunah hian sorkar tha nei tura dan leh hrai kenkawh ngam a pawimawhzia te, khawvel ram changkang apianga dan leh thupek an ngaih pawimawh dan te, khauh taka kenkawh a ni thin dante an sawi a. Mipui nawlpui lawm zawng ringawt ni lo, mitin tan leh ram pum tana tha tur thilah chuan khauh tak leh huaisen taka ram hruaitute an kal ngam a ngaih zia te uar taka sawiho a ni.
Hei bakah hian, tuna Mizoram a dan leh thupek kenkawhna kawnga MNF sorkar a hlawhchham avanga smuggler-te zalenna ram a nih chhoh tak dante, chumi in nghawng tha lo tam tak a neih dan turte sawiho a ni bawk.