Novak Djokovic chuan a mal hliam avangin inkhelh laiin harsatna tawk deuh mahse a buai phah chiam lova. Australian Open third round lut turin hnehna a chang.
Kum 35 mi hian a record siamlai belhchhah turin Melbourne-ah hian vawi 10-na atan champion turin ke a pen chhunzawm a. Ningani khan Enzo Couacaud chu 6-1 6-7 (5-7) 6-2 6-0 in a hneh.
Djokovic hi an inkhelh laiin ‘medical timeout’ a lak a ngai a, a mal hliam chuan a tibuai deuh niin a lang. Nimahsela a elpui thenkhatte an chetsual nual ni ah a chesual ve lo.
Rod Laver Arena-ah mal hliam neisa in a inkhel a. a khingpui Couacaud pawh set hmasa berah a ke a bilh avangin medical timeout a lak a ngai ve tho.
Set hmasa berah Couacaud chetsual avangin Djokovic-a’n harsatna a nei lo. Set hnihnaah erawh Djokovic hliam avangin a khingpui in set a la ve thung a. A hnu lamah erawh Serbian star a che tha tluan thei.
“Kan inkhelah khan thil tam tak a thleng. Enzo khan a tawp thlenga a beihna avangin fak a phu. Set hnihnaah phei kha chuan a kheltha hle.” tiin a chak hnuah Djokovic chuan a sawi.
Inkhel dangah seeded number two changtu Casper Ruud a tlawm a. Nikum a Grand Slam final pahnih khel thei hi Jenson Brooksby chuan 6-3 7-5 6-7 (4-7) 6-2 in a hneh.
Seeded no. 8 Taylor Fritz pawh 6-7 (4-7) 7-6 (7-2) 6-4 6-7 (6-8) 6-2 in tualchhung mi Alexei Popyrin lakah a tla a. Inhliam damkawr twelfth seed Alexander Zverev pawh a tlawm.