NGO Coordination committee-in Myanmar indo thlawhnaten Mizoram chhunga bomb a thlak chungchang union home minister hnenah an thlen a, India ram chhungah Myanmar sipaite an chet tawh lohna tura hma la turin an ngen nghal.
NGO-CC hruaitute chuan Union Home Minister chu Mizoram Larsap office kaltlangin lehkha an thawn a, nimin khan Memorandum chu Secretary to the Governor V. Lalthansanga hnenah an thehlut.
An lehkhaah chuan January ni 10 leh ni 11-ah te Myanmar indo thlawhnaten India ram chhung, Mizoramah bomb an thlak a, hei hian mipui a tiralkhelin hmun tihchhiatte pawh a nei tih an tarlang a. Myanmar sipaite chetna hian India ram chhunga state ralmuang ber Mizoram chu a tilungngai hle nia tar langin, he thil thleng hi India mipui mai ni lo, Mizo mipuite dikna chanvo palzutnaa an ngaih thu an tar lang.
NGO-CC chuan India sorkar chu a mipuite humhim kawnga thu sawi tur leh hma la tur te, Mizoram chhung, leiah emaw boruakah emaw sipai inrawlh theihnate venhim reng a nih theihna tura hma la turtein an ngen a. Rawng taka mipuite laka Myanmar sipai sorkar chetna chu thlir liam mai lova, tanpui an ngaihnaah a theih ang anga hma la tura sorkar laipui chu ngenin, Myanmar rama remna leh muanna a awm theihna tura hma la tura ngennate an lehkhaah chuan an tar lang bawk a ni.