Mizoram State Boundary Committee nimina thukhawmin Mizoram sorkarin ramri nia a pawm huam chhunga khaw awm leh an huam chin, mi cheng leh hnam awmte chanchin lakhawmtu tur study group an din.
State Boundary Committee thutkhawm vawi ngana Forensic Science Laboratory, Conference Hall-a neih hi Home Minister Lalchamliana’n a kaihhruai a. November 16-17, 2022-a Guwahati-a Mizoram leh Assam aiawhte an inbiak tuma thuchhuah intawm an siamte an thlirlet.
State pahnih aiawhte inbiain thuchhuah intawm an siamah khan ‘Mizoram sorkarin ramri nia a pawm huam chhunga khaw awm te, an huam chin te, a geo spatial extent te, heng hmuna cheng te chanchin leh hnam awm (ethnicity) chanchin leh chanchin dang te thla thum chhunga lakkhawm’ a tel a. Hei hi nimina Mizoram State Boundary Committee thukhawm chuan sawihovin a buaipui turin study hroup an din a, convenor atan Prof. J Doungel, Mizoram University ruat nghalin member secretary atan Lalthiamsanga Sailo an ruat bawk.
Boundary committee thukhawm kaihhruaitu, home minister chuan, “Mizoram leh Mizo mipuiin ramria kan pawm tlan chu BEFR 1875 a ni,” tiin, “Hei hi November 17 inbiaknaah pawh kan tanchhan a ni,” a ti.
Nimina thutkhawmah hian IGP (Hqrs) John Neihlaia’n ramri depa dan leh thupek kenkawh leh tun hnaia Kolasib district depa thil thlengte a report a. Committee Member Secretary, Home Commissioner & Secretary H. Lalengmawia’n November 16-17, 2022-a state pahnih aiawhte inbiak chungchang report a pe bawk.