Manchester United chuan Austrian midfielder Marcel Sabitzer chu Bayern Munich atangin season tluan atan loan in an hawh.
Kum 28 mi hian Erik ten Hag-a squad hi season tawp thleng atan zawmin Christian Eriksen inhliam avanga midfield hmunawl awm tur hnawh khah nan lakluh a ni a. Scott McTominay-a’n tunhnaiah harsatna a neih leh thin bawk avangin bazar inkhar ni ah United in lakluh dan rang takin an dap.
Kum 2021 August thla a Bayern Munich zawmtu Sabitzer hian German champion tan vawi 54 a inkhel tawh a. Bayern midfield-ah inkhel bul tantu ni pha lo fovin khelhna hmun a chan tam loh avangin chhuah a thlang.
“Hringnunah hian thutlukna pawimawh hi vawi leh khat a siam thuai a ngaih chang a awm thin. Ka tan he huntha hi a inhawng tih ka hriat rual khan ka tana tha tur a ni tih ka hre nghal”
“Chak duh mi, tang thei tak a ni a. Hlawhtlin ka duh a, he club in tun season a tum a neihte hi tihlawhtling turin ka pui dawn a ni.” tiin a sawi.
Austria tana vawi 68 khel tawh Sabitzer hi RB Leipzig captain ni reng thin a ni a. Inelna pali la khel United in midfielder tawnhriat nei tha an lakluh belh.