Kum 2011-a atanga thawh tan, March 17, 2014-a zawh fel tura ruahman, Mamit district paltlanga Manu, Tripura thlenga siam tur kawngpui, NH 44A siam hna, Gayatri Projects Ltd. hminga Ratna Infrastructure Pvt Ltd-in an thawh nia sawi chu tun thlengin zawh fel a la ni lo va, a vawi thumna turin hnathawhna tur sum ruahman ennawn (revised)-a tihpun a ni dawn.
He kawng siamna tur hian a tirah Rs vbc 624.41 ruahman a ni a, March 2, 2011-ah hna tan niin, zawh hun tura tih, March 17, 2014-ah zawh a ni lo va, July 17, 2015 thleng hun pek leh niin, hna an tan atanga kum lina, kum 2015-ah hnathawhna tur sum ennawnin Rs vbc 713.5-ah tihpun a ni ta bawk a, a punna hi Rs. vbc 89.09 a ni.
Hna zawh hun tur atan July 17, 2017 ruat leh a ni chungin zawh hman a ni lo leh a, kum 2018-ah a vawi hnihna atan sum ruahman pawh ennawn leh niin, a hma aia a punna sang zawkin Rs vbc 992.67-ah tihpun a ni a, a punna Rs. vbc 279.17 niin, December 31, 2020-a zawhfel tura tih a ni leh chungin tun thlengin zawh fel a la ni ta lo zel.
A vawi thumna turin hnathawhna tur sum chu ennawn leh a ni a, ministry of road transport & highways-in a pawm tura thehluh chu Rs vbc 1,136.45 ni mah se, Rs vbc 1109.88-ah tihpun a ni leh dawn.
NH 44A siam hnathawhna tur sum punna, Rs vbc 117.21 hi engtikah nge hmuh a nih dawn sawi theih a nih loh thu thudawnna chuan a sawi a. Road transport & highway ministry secretary-in video conference hmanga a pawm chu beiseina nen an thlir mek thu a sawi.
Sum ruahman pun lehna hmang hian NH 44A siam hna chu zo fel vek tawh tura tih niin, October, 2022 ral hmaa zo fel tura tih a ni bawk.
NH 44A-ah hian lirthei tana zawh harsa tak tak a la tam hle a, chetsual hlauhawm khawpin kawngko hnim sam fai loh a tam a, hengte hi hnathawktu company tihfai tur niin, tun thla chhunga sam fai vek tura hriattir an ni tawh tih thudawnna chuan a sawi bawk a ni.