Home Minister Lalchamliana’n Mizoram leh Assam ramri chungchangah Mizoram sorkar chu 1875 BEFR notification-a a din ngheh thu a sawi a, Assam lam chu 1933 notification-ah an ding thung niin a sawi.
He thu hi Lalthuamliana lehkhabu buatsaih, ‘Mizoram leh Assam Ramri Buaina’ tih nimina a tlangzarhnaah a sawi a. Mizoram sorkar chuan a duh anga a tanhmun turte tichiangin document-te pawh a nei tha thawkhat tawh nia sawiin, a tul anga inbe turin a inpeih tawh niin a sawi.
Home minister chuan ramri ching fel tur chuan pakhat duh dan ngawt a tlang thei lova, lehlam lehlam inrem a ngaih avangin chin fel a awlai lo,” a ti a. India ram leh ram dang inrina buaite pawh hun rei tak buaipui hnuah pawh chin fel theih a ni rih lo tih sawiin, state ramri ching fel tur pawhin boundary commission-te pawh din ni mah se, ramri chin fel tak tak chu a har an ti ve hle niin a sawi.
Kum 2018, February-a Bairabi Zophaia Mizo zirlaite buk sak Assam sorkarin thiahsaka silai hmet puaka zirlaite an um darh vak hnuah Mizoram sorkarin ramri chungchang ngawrh lehzuala buaipui turin chief secretary kaihhruaiin core committee a din tih home minister chuan a sawi a. Hemi hnua sorkar lo ding tharin dy. chief minister chairman-na hnuaiah Boundary Committee dinin member-te pawh a huam zau thei ang ber tura ngaih angin political party tin leh NGO liante tel kim thei ang bera din a nih thu a sawi.
Ramri buai chin felna tura din committee-ten ramri chin felna atana lehkha pawimawh (document) lak khawm leh an hnathawh tawh chinte sawiin, ramri buaina chungchangah political party leh NGO hrang hrang aiawha boundary committee-a telte pawh an lungrual tlang viau niin a sawi bawk.