Java thliarkar, Indonesia-a tlangkang sang ber, Inrinni atanga irh chhuak avanga thi chu mi 34 vel an ni ta tih tual chhung thuneituten an sawi a, chhanchhuah hna thawh chhunzawm zel a la ni.
East Java province huam chhung, Lumajang district-a Mount Semeru tlang kang hi a inphuh chhuah thut hnuah van sang lamah metre 12,000 (feet 40,000) chuang a inphuh chho va, a pang awihah gas leh lava tam tak a luang zui.
Chhiatna hian tlang pang leh a hnuai lama khaw eng emaw zat kawtthler leh inte chu chirh leh meivapin a khuh nghal a ni.
“Mi 34 an thi tawh a, mi dang 16 chin hriat lohva awmte zawn mek an ni,” tiin tual chhunga mi zawn leh chhanchhuah lam buaipuitute hotu, Wayan Suyatna chuan Thawhlehni khan an ram sorkar chanchinbu a hrilh a. A hma nia thi zat 14 an thih chu a pung thut a, mi 3,700 dawn hmun himah sawn chhuah an ni bawk.
Chhanchhuah hna thawktte hian a inphuh chhuah atang khan hlauhawm tak karah an thawk a. Chirh sa leh in chim karah te, lirthei chhe karah te dam chhuak an zawng a. Thawhlehni atang kha chuan ui fing nen an bei tawh.
Mount Semeru hi Inrinnia a inphuh chhuah atang han a la kang reng a, a khât tawkin a inphuh chhuak reng a. Thawhlehni pawh khan tenau deuhvin van lam km khat vela sang a inphuh chhuak leh niin thuneituten an sawi.
Thuneitute chuan a inphuh chhuah tanna atanga km nga bial chhungah tumah kal lo turin an ngen a. A bul hnai boruak chu a bawlhhlawhin mihring derdep deuh tan phei chuan hlauhawm tham tak a nih thu an sawi bawk.