Omicron coronavirus variant zirchianna neih mek zela an hmuh chhuah tawh chinah he hri hi hri lo kai tawh leh invenna la tawhte tan pawh variant awm hmasate aia kai awl zawk; mahse, natna na lo zawk thlen thei a nih hmel tih World Health Organization chuan a sawi.
“South Africa atanga data kan hmuh atang chuan Omicron hi kai nawn a awlsam hle a ni,” tiin WHO chief Tedros Adhanom Ghebreyesus chuan Nilaini zana thuthar lakhawmtute a kawmnaah a sawi a. “Finfiahna thenkhahah chuan Delta aiin natna a thlen nep zawk thung,” a ti.
A thil sawi hi ‘a ni chiang e’ tia nemnghet tur erawh chuan data tam zawk an la mamawh tih a sawi a. Khawvel ram hrang hrangte chu Omicron nihna chiang zawk hriat theihna tura an thil hmuhte hrilh zel turin a ngen bawk.
Hri lo chhuak tawhte atanga insiam danglam nasa tak, Omicron avang hian khawvel a buai leh hman hle a. Tam tam tak chuan ramri an khar nghal a, sumdawnna lamte pawh khar mai thei dinhmunah an din phah leh hman hlawm.
Omicron hian natna nep zawk thlen thei anga ngaihna awm mah se Tedros chuan ngaihthah erawh a chi loh tih a sawi a. “Thihna a thlen thei tho dawn a ni,” a ti.
WHO emergencies director Michael Ryan pawhin he hri hi “inkai a awl a, Delta variant aiin a awlsam zawk daih a ni” tiin a sawi.
“Inkai a awl tih avang hian dahchah theih loh tihna erawh a ni lo,” a ti a. “Mahse, mihring leh mihring inkaichhawn a awl em em a, hei vang hian keimahni leh mi dangten an kai lohna tura invenna hi tuna kan kalpui leta kan kalpui a ngai tihna a ni,” a ti.