North Eastern Electrical Power Corporation (NEEPCO) in a hun taka kawlphetha leina man a pek theih loh avanga Mizorama kawlphetha mamawh a pek thin titawp tura a vau chu nimin khan chinfel a nih thu leh harsatna a awm loh tur thu Power & Electricity (P&E) department hotute chuan an sawi.
Kumin October thla tir khan NEEPCO hian Executive Director, Northeast Regional Load Dispatch Centre (NERLDC) hnenah Mizoram sorkarin a hun taka kawlphetha a leina man a pek theih loh thu leh, October 25, 2021 thleng khan P&E dept, Mizoramin kawlphetha leiman man a batsak hi Rs vbc 15.78 a tlin tawh thu an thlen a. An beisei loh ang leh an inremna anga P&E dept, Mizoramin kawlphetha leina man a hun taka a pek theih loh avangin December 10, 2021 atangin kawlphetha pek tihtawpah an vau a ni.
Hemi chungchangah P&E department hotute chuan The Zozam Times zawhna chhangin, “Mizoram sorkar sum harsatna avangin kawlphetha leina man hi pek lawk theih ni lo mah se, vawiin hian sorkarin treasury atangin Letter of Credit (LC) hnawh khatna tur Rs vbc 16.4 pek chhuah a ni a. Chumi a nih chuan a fel thawkhatah kan ngai,” tiin nimin khan an sawi.
“NEEPCO nena kan inremna angin LC-ah kawlphetha leina bill an rawn serve atanga ni 45 chhunga pek tura tih a ni a. Ni 45 chhunga pek hman a nih loh chuan LC leina turin bank-ah sum dah lawk atangin an pawt chhuak ta thin a. Hei hi an lak chhuah atanga ni sarih chhunga dah khah leh thin tura tih a nih angin hnawh khah reng a ngai a. Hemi hi hnawh khat a nih loh avangin NEEPCO atangin vauna a lo kal a ni,” tiin, tum dangah pawh hetianga vauna hi a thlen fo tawh thu leh chin fel zel a nih thu an sawi.
P&E department hotute chuan kawlphetha lei hrim hrimah chuan harsatna a awm loh thu leh, payment-ah erawh a hun takah pek thin a nih loh thu an sawi a. “Sorkar sum dinhmunte a that hunah dan pangngai angin kan inpe leh zel thei tho tura kan ngai,” an ti bawk.
Eng chhit man a hun takah mipuite’n an pek thin laia sorkarin kawlphetha leina man a batsak thin chungchangah, “Mipuiin eng chhit man an pek te hi sorkar sum zem puiah a lut vek a. Hei hi chu kawlphetha leina man chauh atana hman tur tihna a awm chuang lo. Sorkarin a duhnaah a hmang thei vek a, sorkar thu thu a ni,” tiin The Zozam Times zawhna an chhang.
P&E department hotute chuan, Mizoramin kawlphetha a leina man aiin mipui atanga hmuh let a tlem thin thu an sawi a. Kum khatah kawlphetha leina atan sorkarin Rs vbc 300 a ruahman chu an khamkhawp loh thu leh an dil belh mek thu an sawi a. “Kawlphetha kan lei kan tih hian, transmission charge neuh neuhte a awm thin. A power man ngau ngau hi a ni thin lo,” an ti.
P&E department hotute sawi danin, tun dinhmunah Mizoramin kawlphetha hi NEEPCO bakah ONGC Tripura Power Company (OTPC), Tripura State Electricity Corporation Ltd (TSEL), National Hydroelectric Power Corporation (NHPC) leh National Thermal Power Corporation Limited (NTPC) atangin lei thin a ni.