Citizenship (Amendment) Act, 2019 (CAA) chu parliament-a pass a nih hnu kum hnihah pawh Ministry of Home Affairs (MHA) chuan he dan kaihhruaina (rules) a la tichhuak lo va. Dan (act) hi a rules tihchhuah a nih hma chuan hman a ni ngai lo.
CAA hi pass a nih hnuah khan December, 2019 leh March, 2020 inkara Assam, Uttar Pradesh, Karnataka, Meghalaya leh Delhi-a a duh lohna lantirnaah khan mi 83 zet an thi.
CAA hi Lok Sabha-ah December 9, 2019-ah pass niin Rajya Sabha-ah December 11-ah pass zui a ni a, president-in December 12-ah a hming ziah hnanin a pawmpui a. MHA chuan act hi January 10, 2020 atanga hman turin hriattirna a tichhuak bawk.
Tar lan fo tawh angin CAA hi Pakistan, Afghanistan leh Bangladesh atanga India-a December 31, 2014 leh a hma lama Muslim ni lo pem lutte India mi anga pawm theihna dan a ni.
Ministry hian rorelna in pahniha committees on subordinate legislation-ah ziakin a rules zam leh tihchhuah hun atan January 9, 2022 thleng hun pek belh a lo dil tawh.
Manual on Parliamentary Work-a tar lan a nih dan chuan ministry/department-ten dan siamte hi parliament-a pass a nih atanga thla ruk chhunga a rules a siam zo hman lo a nih chuan Committee on Subordinate Legislation-ah hun dil belhin hun an mamawh chhan an tar lang tur a ni a. Hun dil belh hi thla thum aiina rei tur a ni lo thung.
MHA hian rules an siam peih mai loh chhan hi engmah a sawi lo thung.
Ningani khan Minority Affairs Ministry chuan Lok Sabha-ah CAA thuneihna chin leh dan anga hman a nih theih dan tur chin hi Supreme Court-ah khin mek a nih thu a hrilh a. Rajathan leh Kerala sorkarte pawhin Article 131 hnuaiah an khing mek bawk.
CAA hi state tam takin an duh lo va. Sorkar laipui pawhin Meghalaya, West Bengal, Tamil Nadu, Kerala leh Punjab assembly atangin he dan an hman dawn loh thu an thlen tawh a. Rajathan leh Kerala chuan Supreme Court-ah Article 131 hmangin petition a thehlut bawk.
Assam, Meghalaya, Mizoram leh Tripura-a tribal-te chu ram danpuia Sixth Schedule-ah an tel avangin Arunachal Pradesh, Mizoram, Nagaland leh Manipur chu CAA hian a huam dawn lo thung a ni.
%%%%%