Republic veng Presbyterian Kohhran Biak Ina synod rorel kal meka Aizawl West II Presbytery atanga thu lut, kohhran inkhawm leh inkhawm dangte tihtlem chungchang lo zirchiang turin Synod Executive Committee (SEC) an ti a. “SEC zirchianna report chu Synod 2022-ah ngaihtuahho leh ni se,” an ti.
Aizawl West II Presbytery atang veka lut, Mizoram Presbyterian Kohhranin Mizorama Chanchin Tha Thlen Ni atana a pawm tak, March 15 chu Mizoram sorkar chawlha puang tura sorkara thlen rawtna chu rorel palaiten ‘kan kal dan ngai hi a tha e’ tiin, chawlh puang tura sorkara thlen chu tul lovah an ngai.
Synod palaite chuan Act East Policy zirchiana hmalak rawtna, Aizawl Hmar Presbytery atanga chu SEC-in a lo bawhzui turin an rel a. Elementary china syllabus-a Moral Education subject telh tura hmalak rawtna, Champhai South Presbytery atanga lut pawh SEC-in a bawhzui turin an ti bawk.
Zirnain hma a sawn theihna tura sorkar leh Synod thawhdun dan kawng zawn rawtna, Aizawl Central Presbytery atanga lut pawh lo zirchiang turin SEC an ruat a, 2022 Synod-a ngaihtuah that leh atan an dah.
Kohhran Pathian biak inkhawm kalhmang zirchian rawtna, Aizawl Hmar Presbytery atanga lut chu lo zirchiang turin SEC an ruat a, 2022 Synod-ah SEC zirchianna chu pharha ngaihtuah that leh an rel bawk.