Premier League club West Ham United in Europa Conference League semi-final an khel dawn a. Gent lakah hneh taka ‘comeback’ in 4-1 in hnehna an chang.
London Stadium-ah Hammers hian Belgian club hi mikhualin first leg-ah 1-1 a inhnehtawk tawh an ni a, 5-2 aggregate in a sang pali zingah an tling.
Mahni mualah Hammers in goal an chhuah hmasa a, minute 26-naah Belgian striker che tha Hugo Cuypers chuan goal a khung a, tun season-ah goal 20 a khung tawh.
Hammers in first half-ah Michail Antonio hmangin an si phurh an sut a. Second half-ah an goal chhuahna a mawhphurtu zinga tel Lucas Paqueta chuan penalty atangin an goal hnihna a khung.
Captain Declan Rice chuan goal mawi tak khung belhin anmahni lam atangin ball tlan luhpuiin tun season a goal ropui zing ami a khung. Antonio bawkin an goal hnuhnung ber a khung ve leh bawk.
Hammers hian goal nga khung thei an ni a, mahse Jarrod Bowen goal khung chu handball avangin pawm a ni lo.
London club hian an club chanchin a tum nga nan cup inelna semi-final an khel dawn a. Kum 1980 hnua a vawikhatna atan trophy chawi theihna hun nei thei turin ke an pen a. Dutch club AZ Alkmaar nen semi-final ah hian an inkhel ang.
Hammers manager David Moyes chuan, “Halftime laiin ka lung a awi chiah lo, 1-1 nimahsela goal ho tak kan chhuah niin ka hria. Team tha zawk erawh kan ni tho ah ka ngai.” tiin an inkhel chungchang a sawi.
Inkhel dangah Hammers tum tur AZ hian Vangelis Pavlidis goal hnih hmangin Belgian club tho Anderlecht 2-0 in an hneh a, 2-2 aggregate a intlukin 4-1 in penalty-ah an chak.
Italian club Fiorentina chu mahni mualah Lech Poznan lakah 3-2 in tlawm mahse 6-4 average in an tling a. Anni hian French club Nice barakhaihtu FC Basel an tum dawn a. Swiss club hi 2-1 in, 4-3 aggregate in an tling.