Manchester United chu Europa League quarter-finals atangin paih chhuah in an awm a. Sevilla lakah zuih ral chiang hle in goal thum an chhuah avangin 3-0 in an tlawm.
Ramón Sánchez Pizjuán Stadium-ah United an pherh a. Mualneitu lam tantute thawm ring hle bawkin anmahni tualchhung league-ah che chhe mahse Europa League-ah chuan Seville khaw club hi sa dang daih an ni tih an lantir.
United nen minute 180 an inkhelh chhungin player nei tha zawk chu an chiang. Mahse hnehna chan phu zawka inlanin semi-final an lut.
United goal thum chhuahah an tlarhnung tihsual a tel vek. Hei chauh a ni lo, an tlarhma in goal hlauhawm an siam hleithei lova, midfield-ah Sevilla player-te an langsar zawk a, English club in inkhel thunun lai an nei meuh lo.
Spanish team hi minute 8-naah United in goal an ‘khilai’ a, goalkeeper captain Harry Maguire chuan David de Gea hnena atangin ball a ko a, goalkeeper in pass in England defender hian amah hnaihtu player pahnihte hre zui lovin ball an chhuhsak a, Youssef En-Nesyri chuan goal a khung.
Sevilla hian halftime hma in goal khung belh leh mahse Marcos Acuna offside avangin pawm a ni lo.
Second half-ah erawh goal an khung belh thuai tho. Corner atanga defender Loic Bade in ball a tauh chu De Gea ban phak lohin goal-ah a tla lut a, Spanish goalkeeper positioning fuh lo avangin a goal.
An goal hnuhnung ber pawh United mualphona tho niin Sevilla goal lam hnaih atang boruakah ball pet luh a ni a. De Gea in awlsam taka la mai tura a lan laiin ball a khawih per a, En-Nesyri bawkin goal ruakah a pet lut.
Sevilla coach José Luis Mendilibar chuan, “He team hian thil ropui tak tak a lo ti tawh thin. Manchester-ah dinhmun harsa atangin kan tho leh a, kha khan beiseina min pe. A tawpah kan hlawhtling a, harsatna nei lem lo a Manchester United hneh theih hi kan inbeisei lo.” tiin a sawi.
Roma an ‘comeback’
AS Roma in extra-time ah goal hnih an khung a. 4-2 aggregate a Feyenoord hnehin semi-final an khel dawn.
Stadio Olimpico-ah Jose Mourinho pawlte hian 1-0 a tlawm tawh chungin Dutch club an lo mikhual a. Inkhel a awlsam lo.
Minute 60-naah Leonardo Spinazzola hmanga goal khungin an dinhmun a inang. Mahse Igor Paixao chuan goal khungin Feyenoord an tlang mai dawn a ang hman hle.
Minute 89-naah Paolo Dybala chuan Roma si phurh a sut leh a. Hun pekbelhah Stephan El Shaarawy leh Lorenzo Pellegrini ten khung lehin 4-1 in an chak.
Mourinho chuan, “Thenkhat hmuhdan a ni lo mai thei, mahse ka hmuhdanah chuan inkhel hautak takah kan team an kheltha tak zet. He team hi hmalam panlai a ni a, theih tawk chin nei a la ni, mahse kan tanrual em avangin kan hlawhtling thin.” a ti zui.
Juve pawh tling
Serie A lamah an hremna sut a ni a, Europe-ah pawh trophy chawi thei turin ke an pen. Juventus in Sporting Lisbon 1-1 in an draw a, 2-1 aggregate in an chak.
Estádio José Alvalade-ah Juve tan Adrien Rabiot chuan goal a khung a, hei hi Marcus Edwards chuan sut mahse Portuguese club in an khung belh thei lo.
Massimiliano Allegri chuan, “Vawiinah player te an kheltha vek, awlsam lo mahse chak turin kan inpekna a sang hle.” a ti.