Bundesliga in hmahruaitu thar an nei a. Eintracht Frankfurt 4-0 a hnehtu Borussia Dortmund chuan match nga la awmah league table chung ber an luah.
Inrinni zanah Westfalenstadion-ah Dortmund in Eintracht an mikhual a. First half-ah goal thum an khung.
An club chanchina a zawna vawi kua mahni mualah an chakna a ni.
Midfielder ngaihven hlawh Jude Bellingham chuan minute 19-naah penalty area hmawr atangin goal a khung a. Minute nga hnuah Dutch forward tunhnaia che tha Donyell Malen chuan an goal hnihna a khung a. Halftime hma in Mats Hummels-a’n an goal thumna a khung.
Second half-ah Karim Adeyemi thawhrah sengin Malen bawkin a goal hnihna a khung leh a ni.
Inkhel dangah champion lai leh hmahruaitu ni chunga bul tan Bayern Munich chu Mewa Arena-ah an tlawm a. Mainz in 3-1 in an lo hneh.
Tunhnaia chet sual nei leh thin Bayern hian first half-ah Sadio Mane hmangin goal khung hmasa zawk mahse second half-ah an tlarhnung an talbuai leh viau a. Minute 14 chhungin goal thum an chhuah.
Ludovic Ajorque chuan Mainz si phurh a sut hnuah Leandro Barreiro leh Aarón Martín ten goal hnih dang an khung.
Bayern hi Thomas Tuchel hnuaiah match sarih atang vawi hnih chiah an la chak.