Cricket Association of Mizoram in junior level inelna a buatsaih CAM Under-16 Boys Tournament final chu Inrinni khan an khel a. Final-ah hian Ramhlun Venglai Cricket Club in run 87 in Zemabawk Pitchers Cricket Club an hneh.
Durtlang Playground a inkhelah hian Ramhlun Venglai hian vuak hmasak an thlang a. Bat hmangin an theihna tak an pholang.
Over hnihnaah wicket hloh mahse opener Rosangkima chuan run 48 a siam a, ball 53 atanga run 69 siam Lalruatsanga Khiangte nen run 123 partnership an nei a. Hei hi hnehna an channa kawnga pawimawh tak a ni.
Over 16..1 ah B. Lalremruata a rawn lut a, huaisen taka ball vua in 6 runs leh 4 runs vawi thum ve ve a vua a, ball 17 hmachhawnin run 39 a siam. Hei vang hian Ramhlun Venglai hian over 20 chhuungin run 181 an siam.
Zemabawk bowler zingah Lalrinfela leh Zorinsanga ten wicket khat ve ve an la a, C. Vanlalnghaka leh Lalchhanhima ten run out vawi khat ve ve an nei.
Ball hmangin RVL an tangrual tha hle a. Rosangkima’n over 3 vawmin wicket 4 a la a. Vanlalfaka chuan wicket hnih la bawkin Rodawngzela, Malsawmhlua Pachuau leh Lalrinnunga Ralte ten wicket khat theuh ve ve an la bawk.
Pitchers tan Zorinsanga chuan ball 22 atang run 38 a siam a, Lalchungluar leh C. Vanlalnghak te chiahin run sawm aia tam siamin a hnung an zui thei a, hei vang hian over 17.1-ah run 94 bak an tlin thei lo.
Mimal chawimawina
Tournament chhunga batsman tha berah Ramhlun Venglai tana innings 5 chhunga run 275 siam B. Lalremruata thlan a ni a.
Best bowler-ah Zemabawk Pitchers tana tournament chhunga wicket 10 la Lalchunglura thlan a ni ve thung.
Tlangnuam Cricket Club tana wicket 10 la a run 119 siam bawk Lalthapuia chu Man of the Series a thlan a ni.
Champion team hian Rs. 12000 bakah round tin match money an dawng a. Runner up in Rs 8000 leh match money an dawng vek bawk.