UK Prime Minister Boris Johnson leh India Prime Minister Narendra Modi te chuan biak hmuh theih hmanga inkawmna an neihnaah ram pahnih insumdawn leh intanpuina tawnna thuthlung an siam a. Great Britain Pound (GBP) tluklehdingawn sangkhat dawn hu a ni.
UK Prime Minister chuan, “British sorkarin India nena insumdawn tawnna leh kawng hrang hranga hnathawhna atana hman turin Great Britain Pound tluklehdingawn sangkhatin inremna a siam a, Britain ramah hna 6,500 chuang siam theihna a tel,” tiin a puang.
Enhanced Trade Partnership (ETP) hnuaia inremna an siam hi ram hruaitu pahnihte hian mumal zawkin hming an la ziah hnan ang.
ETP hmang hian kum 2030-ah UK-India insumdawn tawnna a letin a pung thei ang a, Free Trade Agreement (FTA) tihhlawhtlina kawnga sulsutu a ni bawk ang.
“Hna 6,500 chuang siam tur ruahmanna duan hmang hian coronavirus avanga harsatna tawk chhungkua leh khawtlang siam thatna kawngah ngaiawh leh turin min pui dawn a, chu bakah British leh India economy-in hma a sawn phah ngei ang. Kum 10 ral hnuah tuna inremna thuthlung kan siam hmang leh FTA hmang hian kan ram pahnih insumdawn tawnna hi a letin a puang ang a, ram pahnih inkungkaihna nasa takin a nghet bawk ang,” tiin a tarlang.
India hian Britain ramah sum peipunna atan UK Pound maktaduai 533 vel seng dawn a. Healthcare leh technology lamhawi a ni ang. Hemi zingah hian UK-a Serum Institute of India (SII) indinna tur a tel a, anni hian an sumdawnna zauhna turin US pound maktaduai 240 vel an invest dawn a, US dollar tluklehdingawn khat vel hlawkna an hmuh thuai theih a rinawm.