Taksa lama bawrhsawmna vangin Celine Deion chuan live show ruahmansa tawh zawng zawng chu a cancel fai vek a, mipui hmaa inlan turin chakna a nei tawk lo, a ti.
Nikum khan natna khrih tak- Stiff-Person Syndrome (SPS) a neih thu a lo puang tawh a, hei hian zai lamah harsatna nasa tak a thleng.
Heti hi a nih vangin 2023 leh 2024 chhunga show a neih tur zawng zawng chu a thulh fai vek ta tihna a ni.
Thuchhuah a siamah kum 55 mi chuan, “Beidawnna nasa tak ka thlen che u vangin pawi ka ti hle mai. Ka rilru hi a tikehsawm vek mai. Stage-a inlan tura ka fit leh hma chu cancel mai hi ka tan a tha ber si a ni,” a ti a.
“Ka beidawng reng reng lova, inhmuh leh thuai hlan ka nghakhlel takzet,” a ti bawk.
Nikum December khan French Canadian singer hian Instagram-ah rilru khawih thei tak video dahin, SPS vanga enkawl mek a nih thu te, ruahman anga February thlaa European tour a kalpui theih loh tur thu te a sawi.
A natna hian a tihrawl a tibuai hle thin a, chuan vocal cord hmanna turah harsatna thlenin, tunhma anga zai leh fit taka han chetvel kha atan thil tih theih loh a ni chho ta hial.
‘Courage World Tour’ hi 2019 atang khan tanin Dion hian Covid-19 vanga khawvel a buai vak hma thleng khan show 52 a nei zo hman.
Mahse, SPS vanga enkawl a nih hnu ah erawh North American tour a thulh nghal a, European tour pawh sawnhlat nghal a ni bawk.
Zirtawpni khan European tour pawh hi a zavaia thulh fai vek a ni a. Hetah hian London, Dublin, Paris, Berlin, Armsterdam, Stockholm leh Zurich te telin, fan tam tak tak beiseina leh nghahlelhna chu tun atan chuan a thlawn mai a chang zo ta a ni ber.