A zawna vawi thumna atan Max Verstappen-a’n hnehna a chang a, tun season intlansiak vawi sarih awm tawh atang vawi nga a chakna niin world champion ni lai in kuminah a vawi thumna atan Formula 1 world champion ni leh turin a dinhmun a sawhnghet mek.
Dutch driver hian F1 intlansiakah vawi 40 pakhatna a hauhna niin amah hnaih bertu a teammate Sergio Perez aiin point 53 in drivers’ standings-ah a sang tawh zawk.
Circuit de Barcelona-Catalunya tlankawngah Verstappen hi a chungnung fal a. |umdang aia che tha Mercedes car pahnihten a hnungzuiin Lewis Hamilton leh George Russell ten pahnihna leh pathumna an hauh.
Hmahruaitu hnung lama intlansiak hmuhnawmah Russell hian dawhsan a ding turin intlansiak tawp lamah Perez a dan tluan a ngai ve bawk a, kuminah a vawikhatna atan dawhsanah British driver beiseiawm hi a ding.
Italian team Ferrari tan kartawp a duhawm lo. An car-ah upgrade hmang mahse an setup a fuh lo. Carlos Sainz chu pahnihna atanga bul tan nimahsela pangana bak a ni thei lo.
Aston Martin pawhin nidang an pha lo. Fernando Alonso chuan intlansiak tawp lamah 10-na atangin driver pathum a lehpel thei a, pasarihna a hauh thei hram.
Mercedes in hma sawn
Nikum a F1 in technical regulations thar a hman atangin inelna thunun reng thintu Mercedes an tlahniam a, kuminah pawh ngai an la awh lo.
Kar hmasa khan Monaco-ah an car-ah ‘upgrade’ an hmang tawh. Nimahsela Monte Carlo tlankawng a zim a, car tihhmasawn in awmzia a nei thui lo.
Spain-ah hmasawnna a hmuh theih ta chiah. A hma berah Verstappen a fal a, Zirtawpni practice session nen zawng zawngah pawh tuman an pha lo.
Nimahsela a hnungah midang zawngin harsatna an tawh laiin Mercedes car khalhtute an buai ve lo.
Palina atanga bul tan Hamilton-a’n a hma awmte a um thei viau a, tyre ral chak zawngah pawh harsatna a nei lo.
Chutiang bawkin Russell pawhin 12 atang bul tan mahse intlansiak a kal rei deuh tihin a hma amite a um thei leh viau.
Mercedes chetthatna chhan zinga lian chu an ‘high downforce’ setup a ni a. Catalunya tlankawngah hian kawng kual thui tak tak, chak taka tlan kual a ngaihna a tam. Hei hian car tyre a ti rim a, a bikin a hnung veilam in a tuar zual.
Hei hi Mercedes tan buaina a ni ve lo niin a lang a, qualifying-ah anni aia tlanchak thei awm mahse intlansiak ni ah ‘race pace’ ah Verstappen tih lovah an tha ber.
Hei chiah hi Ferrari harsatna a ni ve thung. Spain-ah ‘upgrade’ hmang mahse car setup an ti fuh thei lo.
Charles Leclerc chuan qualifying-ah a ke hnung veilam vangin kawng kualah harsatna a nei. 19-na bak ni lovin a car khawih danglam an duh avangin pitlane atang bul a tan a ngai a, point hmu zingah a tel pha lo.