Miami Heat in tun NBA Playoffs-ah a vawikhatna atan Denver Nuggets chu mahni mualah an tlawm tir a. NBA Finals game 2-ah 111-108 a hnehna chang turin an bei let.
Hnehna an chan avangin best-of-seven series-ah 1-1 in an inhnehtawk mek.
Heat hian hnehna chang tur hian first half-ah point 15 laiin hniam zawk hman mahse quarter hnuhnung berah Heat hi 36-25 in point score ah an hneh zawk a. Second 48.3-ah Bam Adebayo chuan free throw pawimawh tak vawi hnih a lut. Hemi hnu hian defence tha taka khelin Nuggets lamin point an score belh tawh lo.
Nuggets tan hian star player Nikola Jokic chuan point 41 lai score leh mahse Heat in hnehna an channa tur a dal zo lo.
Heat tan a hun takah role player Gabe Vincent a che tha. Point 23 score in player langsar dang pahnih Adebayo leh Jimmy Butler ten point 21 ve ve an score.
Nuggets hi March 30 hnuah an court a an tlawm leh hmasak ber a ni a. Coach Michael Malone a lawm lo.
“Kan inpekna sawi a ngai. NBA Finals a ni a, inpekna chungchang hi sawi a la ngai. Hei hi a lawmawm lova, ngaihtuahna ti thui tak a ni.” tiin a sawi.
Heat hi NBA chanchin a playoffs a seeded number 8 ni chunga champion thei hmasa ber nih an tum a. Coach Erik Spoelstra chuan, “Kan player-te hi chak duh mi vek, inel inpeih at reng an ni a, fourth quarter-ah khan an ngawi mai mai dawn lo tih a chiang.” tiin a fak.