Aizawl : District Jail leh inkhunghranna Home hrang hranga awm ten hriselna tha an neih theihna tur leh hri inkaichhawn theih laka inven nana heng hmuna awmte dinh- mun enfiah kawnga beihpui thlakna, ‘Integrated STI, HIV, TB and Hepatitis (ISHTH) Campaign’ Champhai District-a kalpui tur chungchanga zirhona leh inrawnkhawmna nimin khan Champhai Bawrhsap James Lalrinchhana hovin DC Conference Hall-ah buatsaih a ni.
Champhai Bawrhs- ap chuan a bika ink- hungkhawmna Jail leh Home hrang hrangahte natna inkaichhawn a awlsam bik thu leh a hluar thin thu sawiin, sorkarin heng hmuna awmte hriselna bakah pawn lam thlenga nghawng a neih theihte venhim a ngaipawimawh thu a sawi a. Hemi chungchang bawhzui nan hian June thla chhungin Integrated STI, HIV, TB and Hepatitis (ISHTH) Campaign kalpui tum a nih thu a sawi.
Campaign hlawhtling tak neih a nih theih nan thawhhona tha tak hnuaiah hmalak tlan a tul tur thu sawiin, Bawrhsap chuan ngaihdante sawia inrawnkhawmna zau tak neih a pawimawh tur thu a sawi a. Jail leh Home a awmte hriselna ngaihpawimawh a tul thu sawiin, dinhmun khirh taka ding an nih avangin hmangaihna leh inpekna thinlung pu chunga rawngbawl a tul thu leh ISHTH Campaign kalpui tur chuan hriselna bakah thiamna leh finna a pek dawn avangin rah tha a chhuah ngei a beisei thu a sawi bawk.
Bawrhsap hova thukhawm chuan Integrated STI, HIV, TB and Hepatitis (ISHTH) Campaign khuhhawnna chu District Bawrhsap hovin June ni 12, 2023 chawhma dar 11 ah District Jail Champhaiah neih ni se, an ti a. Hemi hnu hian campaign kalpui chhunzawm nghal a ni ang a, campaign program kimchang duangtu tur sub-committee an din nghal bawk a ni.