Brighton midfielder Alexis Mac Allister chuan club thar a nei hnai a, Liverpool a a insawnna tifel turin medical a nei thuai dawn.
Liverpool hian kum 24 mi hi tun thla a Argentina in Australia leh China te friendly inkhela an hmachhawn hma in an club-ah hian lakluh fel an duh.
Brighton nen hian inbiakna ngawrh tak neiin player aiawhte nen thuphungin inremna an nei tawh bawk a. A manah hian Pound maktaduai 45 atanga 55 inkar vel leichhuah theihna a neih chu Reds hian an hmang dawn niin an sawi.
Mac Allister hi Liverpool in tun nipui a player manto an lak hmasak ber tur a nih hmel ta hle a. Reds hian tun nipuiah midfielder pahnih tal lakluh an duh a, Naby Keita, James Milner leh Alex Oxlade-Chamberlain te an chhuah dawn avangin muallai a khel tur mi thar an duh.
Argentina tana vawi 16 inkhel tawh Mac Allister hian Brighton tan match 112 khel tawhin goal 20 a khung tawh.
Liverpool hian midfielder dang la melh chhunzawm zelin Wolverhampton Wanderers midfielder Matheus Nunes bakah Nice a khel Khephren Thuram leh Borussia Monchengladbach rinrawl Manu Kone te an la ngaihven a. Southampton midfielder Romeo Lavia leh Barcelona a khel Franck Kessie te pawh sawi tel an ni.